Weather Alert: ऐन दिवाळीत अवकाळी संकट, पुणे ते कोल्हापूर धो धो कोसळणार, पश्चिम महाराष्ट्रात अलर्ट

महाराष्ट्रातून मान्सूनने माघार घेतली असली तरी ऐन दिवाळीत राज्यावर अवकाळी संकट घोंघावत आहे. पश्चिम महाराष्ट्रात ‘ऑक्टोबर हीट’चे चटके जाणवत असतानाच हवामान विभागाने पावसाचा इशारा दिला आहे. आज पश्चिम महाराष्ट्रातील पुणे ते कोल्हापूर जोरदार पावसाची शक्यता असून यलो अलर्ट देण्यात आला आहे.

पुणे जिल्ह्यात शनिवारी 32.7 अंश सेल्सिअस कमाल तापमानाची नोंद झाली. आज पुणे जिल्ह्यात विजांसह पावसाचा यलो अलर्ट हवामान विभागाने दिला आहे. यावेळी कमाल तापमानाचा पारा 33 अंशांवर राहील. कमाल तापमानात अंशत: वाढ होऊन विजांसह पावसाची शक्यता आहे.

मागील 24 तासात सातारा जिल्ह्यातील कमाल तापमान 32.6 अंश सेल्सिअस इतके राहिले. आज संपूर्ण साताऱ्यासह घाटमाथ्यावर विजांसह पावसाची शक्यता असल्याने दक्षतेचा यलो अलर्ट भारतीय हवामान विभागाकडून वर्तवण्यात आला आहे. यावेळी कमाल तापमानाचा पारा 33 अंशांवर राहील.

शनिवारी सोलापूर जिल्ह्यात 34.7 अंश सेल्सिअस कमाल तापमानाची नोंद झाली. आज सोलापूर जिल्ह्यात विजांसह पावसाची शक्यता आहे. यावेळी कमाल तापमान 35 अंशांवर राहील.

सांगली जिल्ह्यात मागील 24 तासात 33.4 अंश सेल्सिअस तापमानाची नोंद झाली. आज जिल्ह्यात विजांसह पावसाची शक्यता वर्तवण्यात आली आहे. यावेळी पारा 32 अंशांवर राहण्याचा अंदाज हवामान विभागाकडून वर्तवण्यात आला आहे. 

संपूर्ण पश्चिम महाराष्ट्रात विजांसह जोरदार पावसाची शक्यता वर्तवण्यात आली आहे. पुढील काही दिवस हवामानाची हीच स्थिती राहणार असून सोलापूर आणि सांगली वगळता इतर जिल्ह्यांना पुढील 3 दिवस यलो अलर्ट कायम असेल. त्यामुळे नागरिकांना योग्य ती खबरदारी घ्यावी लागेल.