Weather Alert: तुफान परत आलंय! राज्यात शुक्रवार मुसळधार पावसाचा, अनेक जिल्ह्यांना अलर्ट

राज्यातील काही भागांत पावसाचा जोर कमी झाल्याचं हवामान विभागाच्या अंदाजावरून लक्षात येत आहे. मात्र, 11 जुलै रोजी विदर्भात मुसळधार पावसाची शक्यता कायम आहे. विदर्भातील नागपूर, भंडारा, चंद्रपूर, गडचिरोली, गोंदिया या सर्व जिल्ह्यांना पावसाचा ऑरेंज अलर्ट हवामान विभागाकडून देण्यात आला आहे. पाहुयात, 11 जुलै रोजी राज्यातील इतर ठिकाणी हवामानाची स्थिती कशी राहील.

गेल्या काही दिवसांच्या तुलनेत कोकण विभागात पावसाचा जोर कमी झालेला दिसून येत आहे. मुंबई, पालघर, ठाणे, रायगड, रत्नागिरी, सिंधुदुर्ग या सर्व जिल्ह्यांत तुरळक ठिकाणी हलक्या ते मध्यम स्वरूपाच्या पावसाची शक्यता आहे. या जिल्ह्यांना पावसाचा कोणताही अलर्ट जारी करण्यात आलेला नाही.

पश्चिम महाराष्ट्रातील पुणे, सातारा, सांगली, सोलापूर, कोल्हापूर या सर्व जिल्ह्यांत सुद्धा तुरळक ठिकाणी हलक्या पावसाची शक्यता हवामान विभागानं वर्तवली आहे.

मराठवाड्यातील छत्रपती संभाजीनगरमध्ये हलक्या ते मध्यम पावसाची शक्यता आहे. तर जालना आणि परभणी या दोन्ही ठिकाणी विजांच्या कडकडाटासह आणि सोसाट्याच्या वाऱ्यासह हलक्या ते मध्यम स्वरूपाच्या पावसाची शक्यता आहे. या जिल्ह्यांना पावसाचा यलो अलर्ट जारी करण्यात आला आहे. इतर उर्वरित जिल्ह्यांत हलक्या पावसाची शक्यता आहे.

उत्तर महाराष्ट्रातील नाशिकसह धुळे, नंदुरबार, जळगाव, अहिल्यानगर या सर्वच जिल्ह्यांत हलक्या ते मध्यम स्वरूपाच्या पावसाची शक्यता आहे.

विदर्भातील नागपूर, भंडारा, चंद्रपूर, गडचिरोली, गोंदिया या सर्व जिल्ह्यांत मुसळधार पावसाची शक्यता हवामान विभागानं वर्तवली आहे. या जिल्ह्यांना पावसाचा ऑरेंज अलर्ट जारी करण्यात आला आहे. तर अकोला, अमरावती, बुलढाणा, वर्धा, वाशिम, यवतमाळ या सर्व जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता आहे. या जिल्ह्यांना पावसाचा यलो अलर्ट जारी करण्यात आला आहे.

गेल्या काही दिवसांत राज्यातील सर्वच भागांत जोरदार पाऊस झाला. काही भागांत तर तीन दिवस सततधार पाऊस असल्याने शेतकऱ्यांच्या पिकांचे नुकसान होण्यास सुरुवात झाली होती. 11 जुलै रोजी राज्यातील काही भागांत पावसाचा जोर कमी झाल्याने शेतकऱ्यांना दिलासा मिळण्याची शक्यता आहे. मात्र, विदर्भात मुसळधार पावसाची शक्यता कायम असल्याने शेतकऱ्यांनी काळजी घेणे आवश्यक आहे.