Weather Alert: राज्यात रविवारचा दिवस वादळी पावसाचा, 32 जिल्ह्यांना अलर्ट

राज्यातील दक्षिण कोकणात काही ठिकाणी मुसळधार पाऊस पडण्याची शक्यता आहे. तर दक्षिण मध्य महाराष्ट्र आणि मराठवाड्यातील काही जिल्ह्यांमध्ये काही ठिकाणी विजांच्या कडकडाटासह मुसळधार पाऊस आणि ताशी 30-40 किमी वेगाने वारे वाहण्याची शक्यता आहे. उत्तर मध्य महाराष्ट्रातील जिल्ह्यांमध्ये काही ठिकाणी विजांच्या कडकडाटासह हलका ते मध्यम पाऊस आणि ताशी 30-40 किमी वेगाने वारे वाहण्याची शक्यता हवामान विभागाने वर्तवली आहे. पाहुयात 14 सप्टेंबर रोजी राज्यात हवामानाची स्थिती कशी असेल.

मुंबई शहर आणि उपनगरामध्ये मध्यम पावसासह ढगाळ आकाश राहील तर रात्री किंवा सायंकाळच्या वेळी मुसळधार पावसाची शक्यता आहे. मुंबईतील कमाल तापमान 30 अंश सेल्सियस किमान तापमान 24 अंश सेल्सियस एवढं असेल. तर पालघर, ठाणे, रायगड, रत्नागिरी जिल्ह्यामध्ये काही ठिकाणी मुसळधार पावसाची शक्यता आहे. कोकणातील सिंधुदुर्ग वगळता सर्व जिल्ह्यांना हवामान विभागाने यलो अलर्ट जारी केला आहे. तर रायगड जिल्ह्याला ऑरेंज अलर्ट जारी करण्यात आला आहे.

पश्चिम महाराष्ट्रामध्ये विजांच्या कडकडाटासह ताशी 30 ते 40 किमी वेगाने वारे वाहणार असून अनेक ठिकाणी जोरदार पावसाची शक्यता आहे तर काही ठिकाणी मुसळधार पावसाची शक्यता भारतीय हवामानशास्त्र विभागाने वर्तवली आहे. पश्चिम महाराष्ट्रातील सर्व जिल्ह्यांना हवामान विभागाने यलो अलर्ट जारी केला आहे.

उत्तर महाराष्ट्रातही पावसाचा जोर कायम राहणार आहे. नाशिक, अहिल्यानगर, जळगाव या जिल्ह्यांमध्ये विजांच्या कडकडाटासह आणि ताशी 30 ते 40 किमी वेगाने वारे वाहणार असून जोरदार पावसाची शक्यता आहे. धुळे, नंदुरबार वगळता उर्वरित जिल्ह्यांना यलो अलर्ट जारी करण्यात आला आहे.

मराठवाड्यातील आठही जिल्ह्यांना हवामान विभागाने यलो अलर्ट जारी केला आहे. धाराशिव, लातूर या भागामध्ये पावसाचा जोर अधिक राहण्याची शक्यता आहे. तर उर्वरित जिल्ह्यांमध्ये विजांच्या कडकडाटासह जोरदार पावसाची शक्यता आहे.

विदर्भातील सर्व 11 जिल्ह्यांना हवामान विभागाने यलो अलर्ट जारी केला आहे. अकोला, अमरावती, नागपूर, भंडारा या जिल्ह्यांमध्ये तुरळक ठिकाणी मुसळधार पावसाची शक्यता आहे. तर उर्वरित जिल्ह्यांमध्ये विजांच्या कडकडाटासह आणि वादळी वाऱ्यासह जोरदार पावसाची शक्यता हवामान विभागाने वर्तवली आहे.

एकंदरीत राज्यातील धुळे, नंदुरबार आणि सिंधुदुर्ग वगळता इतर सर्व जिल्ह्यांना हवामान विभागाने यलो अलर्ट जारी केला आहे तर कोकणातील रायगड या एकमेव जिल्ह्याला ऑरेंज अलर्ट जारी करण्यात आला आहे. 14, 15 आणि 16 सप्टेंबर रोजी राज्यामध्ये अनेक ठिकाणी जोरदार तर काही ठिकाणी मुसळधार पावसाची शक्यता आहे.