आजचं हवामान: गारपीट होणार, वादळी पाऊस झोडपणार, पुणे, साताऱ्यावर आस्मानी संकट, 24 तासांसाठी अलर्ट

राज्यात पूर्वमोसमी पावसाने जोरदार हजेरी लावली आहे. सातारा जिल्ह्यात जोरदार वादळी पाऊस आणि गारपिटीची शक्यता आहे. तसेच पुणे जिल्ह्यात वादळी पावसाची शक्यता असल्याने दक्षतेचा ऑरेंज अलर्ट देण्यात आला आहे. पुढील 24 तासातील पश्चिम महाराष्ट्रात असणारे जिल्हा निहाय हवामान अंदाज जाणून घेऊ.

सातारा जिल्ह्यातील तुरळक ठिकाणी पावसाने हजेरी लावली. पुढील 24 तासासाठी साताऱ्यात विजांच्या कडकडाटासह मध्यम पावसाची शक्यता आहे. यावेळी ताशी 40 ते 50 किलोमीटर वेगवान वाऱ्याची शक्यता हवामान विभागाकडून वर्तवण्यात आली आहे. कमाल तापमान 35 अंश सेल्सिअस तर किमान तापमान 24 अंश सेल्सिअस इतके राहिल.

कोल्हापूर जिल्ह्यातील आकाश अंशतः ढगाळ राहून मध्यम पाऊस किंवा गडगडाटी वादळाची शक्यता आहे. यावेळी ताशी 40 ते 50 किलोमीटर वेगवान वारे वाहील. जिल्ह्यातील कमाल तापमान 24 आणि कमाल तापमान 36 अंश सेल्सिअस राहिल.

सांगली जिल्ह्यातील तुरळक ठिकाणी मध्यरात्री जोरदार अवकाळी पाऊस कोसळला. आज कमाल तापमान 36 अंशांवर तर किमान तापमान 24 अंशांवर राहिल. आकाश अंशतः ढगाळ राहून मध्यम पावसाची शक्‍यता आहे. 40 ते 50 किलोमीटर प्रतितास वेगाच्या वादळी वाऱ्याची शक्यता भारतीय हवामान विभागाने वर्तवली आहे.

सोलापूर जिल्ह्यातील पारा 37 अंशावर राहिल. तसेच सोलापुरात ढगाळ आकाशासह मेघगर्जना आणि विजांचा कडकडाट होण्याचा अंदाज हवामान विभागाने व्यक्त केला आहे. वादळी पाऊस आणि गारपिटीचा अंदाज असल्याने सतर्कतेचा येलो अलर्ट देण्यात आला आहे.

पुणे जिल्ह्यात ढगाळ वातावरण असून मागील 23 तासात 33.6 अंश सेल्सिअस कमाल तापमानाची नोंद झाली. तर पुढील 24 तासात पुण्यातील पारा 34 अंशांवर स्थिर राहील. तसेच वादळी वाऱ्यासह तुरळक ठिकाणी पावसाचा अंदाज असल्याने दक्षतेचा ऑरेंज अलर्ट भारतीय हवामान विभागाने जारी केला आहे.

कोकण आणि परिसरावर चक्राकार वारे वाहत आहेत. पश्चिम बंगालपासून झारखंड, विदर्भ, तेलंगणा ते रायलसीमापर्यंत तसेच विदर्भापासून मराठवाडा कर्नाटक ते केरळपर्यंत हवेचा कमी दाबाचे पट्टे सक्रिय आहे. राज्यात पूर्वमोसमी वादळी पावसाचे सावट कायम आहे.