घराच्या 'या' दिशेला चुकूनही लावू नका तुळस, वाढतील आर्थिक अडचणी; 'ही' दिशा उघडेल कुबेराचे द्वार!

हिंदू धर्म आणि वास्तुशास्त्रामध्ये तुळशीच्या रोपाला अत्यंत पवित्र आणि पूजनीय मानले जाते. ज्या घरात तुळशीचे रोप असते, तिथे सकारात्मक ऊर्जेचा संचार होतो आणि भगवान विष्णूंसह माता लक्ष्मीचा आशीर्वाद राहतो, अशी धार्मिक श्रद्धा आहे. मात्र, वास्तुशास्त्रानुसार तुळशीचे रोप लावताना त्याची 'दिशा' अत्यंत महत्त्वाची असते.

दक्षिण दिशा पूर्णपणे वर्ज्य: वास्तुशास्त्रानुसार घराच्या दक्षिण दिशेला तुळशीचे रोप कधीही लावू नये. ही दिशा यमाची आणि पितरांची मानली जाते. या दिशेला तुळस लावल्याने घरामध्ये वास्तुदोष निर्माण होतो, ज्यामुळे कुटुंबाला आर्थिक अडचणींचा सामना करावा लागू शकतो आणि कामात सतत अडथळे येतात.

ईशान्य किंवा उत्तर दिशा सर्वोत्तम: तुळशीसाठी घराची ईशान्य दिशा अत्यंत शुभ मानली जाते. या दिशांना जल तत्वाचे आणि कुबेराचे स्थान मानले जाते. इथे तुळस लावल्याने घरामध्ये सुख-समृद्धी येते आणि धनलाभाचे मार्ग मोकळे होतात.

गच्चीवर लावताना काळजी घ्यावी: अनेक लोक जागेअभावी तुळस गच्चीवर लावतात. मात्र, गच्चीवर तुळस लावल्याने कुंडलीतील 'बुध' ग्रह कमकुवत होऊ शकतो, असा ज्योतिषशास्त्रीय संकेत आहे. जर गच्चीवर तुळस ठेवायचीच असेल, तर ती उत्तर किंवा पूर्व दिशेला ठेवावी आणि तिथे स्वच्छता राखावी.

अंधाऱ्या ठिकाणी लावू नये: तुळशीला सूर्यप्रकाशाची नितांत गरज असते. ज्या ठिकाणी सूर्यप्रकाश पोहोचत नाही किंवा जिथे नेहमी अंधार असतो, तिथे तुळस लावू नका. सुकलेली किंवा कोमेजलेली तुळस घरामध्ये नकारात्मकता वाढवते. जर तुळस सुकली असेल, तर ती सन्मानाने वाहत्या पाण्यात विसर्जित करून तिथे नवीन रोप लावावे.

स्वच्छतेचे नियम: तुळशीच्या कुंडीभोवती कधीही कचरा, झाडू किंवा चपला-बूट ठेवू नका. तसेच तुळशीच्या जवळ काटेरी झाडे लावू नयेत. यामुळे घरातील सकारात्मक ऊर्जेचा प्रवाह खंडित होतो आणि कुटुंबातील सदस्यांमध्ये विनाकारण वाद निर्माण होतात.

पाणी अर्पण करण्याचे नियम: तुळशीला दररोज जल अर्पण करणे शुभ असते, मात्र रविवार आणि एकादशीच्या दिवशी तुळशीला पाणी घालू नये आणि तिची पानेही तोडू नयेत. शास्त्रानुसार, या दिवशी तुळस माता भगवान विष्णूंसाठी निर्जला व्रत करते, असे मानले जाते. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)