'या' नंबर्सवरुन येणाऱ्या कॉल्सपासून सावधान! अन्यथा बँक अकाउंट होऊ शकतं रिकामं

Fake Calls: बनावट कॉल आणि मेसेजेसच्या वाढत्या घटना लक्षात घेता, गेल्या वर्षी ट्रायने एक नवीन धोरण लागू केले ज्या अंतर्गत नेटवर्क स्तरावरच असे कॉल आणि एसएमएस ब्लॉक केले जातात. अनेक टेलिकॉम कंपन्या आता असे फसवे कॉल आणि मेसेजेस थांबवण्यासाठी एआय तंत्रज्ञानाचा वापर करत आहेत. एअरटेलच्या अलीकडील डेटावरून असे दिसून आले आहे की दरमहा लाखो बनावट कॉल ब्लॉक केले जात आहेत.

खरंतर सरकारच्या सतर्कतेला न जुमानता, सायबर गुन्हेगार नवीन ट्रिक्ससह लोकांना फसवण्याचा प्रयत्न करीत आहेत. आता हे गुंड इंटरनेटद्वारे VoIP (व्हॉइस ओव्हर इंटरनेट प्रोटोकॉल) कॉल्स वापरण्यास सुरुवात केली आहे, ज्यामुळे त्यांचे स्थान आणि ओळख शोधणे कठीण होते.

VoIP कॉल्सशी संबंधित मोठा धोका : थायलंडच्या दूरसंचार संस्थेच्या NBTC नुसार, VoIP कॉल्स बहुतेकदा +697 किंवा +698 ने सुरू होतात. हे कॉल ट्रॅक करणे अत्यंत कठीण असते आणि म्हणूनच सायबर गुन्हेगार त्यांचा प्रामुख्याने वापर करतात. एवढेच नाही तर हे गुंड VPN (व्हर्च्युअल प्रायव्हेट नेटवर्क) देखील वापरतात जेणेकरून त्यांची खरी ओळख पूर्णपणे लपून राहील. जर तुम्हाला आंतरराष्ट्रीय क्रमांकावरून, विशेषतः +697 किंवा +698 ने सुरू होणाऱ्या क्रमांकावरून कॉल आला तर त्याकडे दुर्लक्ष करणे चांगले. हे कॉल बहुतेकदा ऑनलाइन फसवणूक किंवा प्रमोशनल स्कॅमसाठी केले जातात. तुम्ही असे नंबर थेट ब्लॉक देखील करू शकता.

तुम्हाला चुकून कॉल आला असेल, तरी कधीही तुमची पर्सनल माहिती शेअर करू नका. हे लोक स्वतःला सरकारी अधिकारी, बँक कर्मचारी किंवा इतर कोणत्याही प्रतिष्ठित व्यक्ती म्हणून ओळख करून देऊन तुम्हाला गोंधळात टाकण्याचा प्रयत्न करतात. अशा परिस्थितीत, त्यांना सांगा की तुम्ही स्वतः कॉल परत कराल. जर त्यांनी वैध नंबर देण्यास नकार दिला तर समजून घ्या की हा कॉल घोटाळा आहे.

'चक्षू' पोर्टलवर अहवाल : खोट्या कॉल आणि संदेशांबद्दल तक्रार करण्यासाठी सरकारने 'चक्षू' पोर्टल सुरू केले आहे, जे संचार साथी वेबसाइटवर उपलब्ध आहे. याशिवाय, एक मोबाइल अॅप देखील उपलब्ध आहे ज्याद्वारे तुम्ही अशा फसव्या कॉल आणि संदेशांची तक्रार सहजपणे करू शकता. तक्रार करण्यासाठी, 'चक्षु' पोर्टलला भेट द्या, संबंधित कॉल किंवा संदेशाची माहिती द्या आणि स्क्रीनवरील सूचनांचे पालन करा.