वाघोली पोलिस ठाण्याचे वरिष्ठ पोलिस निरीक्षक युवराज हांडे यांनी नागरिकांना सजग राहण्याचे आणि आवश्यक ती खबरदारी घेण्याचे आवाहन केले आहे. दिवाळीपूर्व सुरक्षा मार्गदर्शन सत्रात हांडे यांनी नागरिकांशी संवाद साधला. या सत्राला विविध सोसायट्यांचे रहिवासी, सोसायटी पदाधिकारी तसेच वाघोली पोलिस ठाण्याचे अधिकारी आणि कर्मचारी उपस्थित होते.
advertisement
या वेळी हांडे म्हणाले, दिवाळीच्या सुट्टीदरम्यान अनेक कुटुंबे गावाकडे जातात. या काळात चोरटे परिसरावर लक्ष ठेवून संधीची वाट पाहतात. त्यामुळे नागरिकांनी आपल्या घरांची आणि सोसायटींची सुरक्षा पक्की करावी.
गावी जाण्याआधी हे करा
गावी जाण्याआधी सोसायटीमधील सीसीटीव्ही कॅमेरे कार्यरत आहेत का, हे तपासावे. सुरक्षारक्षकांना स्पष्ट सूचना द्याव्यात. घरातील मौल्यवान वस्तू, दागिने, रोख रक्कम घरात न ठेवता बँकेच्या लॉकरमध्ये किंवा इतर सुरक्षित ठिकाणी ठेवाव्यात. तसेच दोन किंवा चारचाकी वाहने सुरक्षित ठिकाणी लॉक करून पार्क करावीत.
पोलिसांनी गस्त वाढवली
दिवाळीच्या पार्श्वभूमीवर वाघोली पोलिसांनी गस्त पथकांची संख्या वाढवली आहे. हांडे यांनी सांगितले की, सध्या रात्रीच्या गस्तीसाठी तीन अतिरिक्त पथके नेमण्यात आली आहेत. या पथकांकडून वसाहती, मुख्य रस्ते, बंद दुकाने आणि परिसरांवर लक्ष ठेवले जात आहे.
दुकानदारांना सूचना
पोलिसांनी व्यापारी आणि दुकानदारांनाही विशेष सूचना दिल्या आहेत. त्यांनी दुकाने बंद करताना कॅश ड्रॉवर रिकामा ठेवावा, सीसीटीव्ही तपासावा आणि सुरक्षा अलार्म कार्यरत आहेत याची खात्री करावी, असे आवाहन करण्यात आले आहे.
या उपक्रमामुळे सणासुदीच्या काळात वाघोली आणि आसपासच्या परिसरात नागरिकांमध्ये सुरक्षा जनजागृती वाढली असून, पोलिसांच्या तत्परतेमुळे चोरट्यांच्या हालचालींवर प्रभावी नियंत्रण मिळण्याची अपेक्षा आहे.