cars : वर्ष संपणार आणि या गाड्या घेणार मार्केटचा निरोप, यात तुमची आवडती कार तर नाही ना?

2023 हे वर्ष ऑटोमोटिव्ह क्षेत्रासाठी खास ठरलं. सरत्या वर्षात अनेक कंपन्यांनी नवीन कार मॉडेल्स लाँच केली, तर काही कार मॉडेल्सनी विक्रीचे नवीन उच्चांक प्रस्थापित केले; पण गेल्या काही वर्षांपासून मार्केटमध्ये मायलेज, फीचर्स, किंमत किंवा खास डिझाइनमुळे चर्चेत असलेल्या कार्स सरत्या वर्षासोबत निरोप घेणार आहेत.

क्विड 800 ही रेनॉल्ट कंपनीची लोकप्रिय आणि बेस्ट सेलिंग हॅचबॅक उत्सर्जनविषयक नवीन नियमांमुळे मार्केटचा निरोप घेणार आहे. या क्षेत्रातले उत्सर्जनासंदर्भातले नियम अधिक कडक झाल्याने मार्केटमधून हे मॉडेल काढून टाकण्याचा निर्णय कंपनीनं घेतला आहे.

प्रदूषणासंदर्भातले नवीन नियम पाहता स्कोडानं ऑक्टाव्हिया आणि सुपर्ब ही दोन मॉडेल्स भारतीय बाजारपेठेतून माघारी घेण्याचा निर्णय घेतला आहे. यासोबतच 2024 मध्ये नवीन मॉडेल्ससह पुनरागमन करण्याचे संकेतही दिले आहेत. भारतात लागू केलेल्या उत्सर्जनविषयक कठोर नियमांमुळे ह्युंदाईने प्रीमियम हॅचबॅक i20 आणि प्रीमियम सेडान व्हेर्नाचं डिझेल व्हॅरिएंट बंद करण्याचा निर्णय घेतला आहे. टोयोटा किर्लोस्करच्या इनोव्हा क्रिस्टाला पेट्रोलवर चालणाऱ्या इनोव्हा हायक्रॉसने स्पर्धेतून बाहेर केलं आहे. हायक्रॉस पेट्रोल हायब्रिड आणि नॉन-हायब्रीड व्हॅरिएंटमध्ये विक्रीसाठी उपलब्ध आहे. तसंच ती उत्सर्जनाच्या नियमांतही बसते.

मारुती सुझुकीच्या सर्वांत यशस्वी कार मॉडेल्समध्ये समाविष्ट असलेली अल्टो ही कार गेल्या दोन दशकांपासून ग्राहकांच्या मनावर अधिराज्य गाजवत आहे. मारुती सुझुकीनं एप्रिल 2023मध्ये अल्टो 800 ला निरोप दिला आहे. नवीन सुरक्षा आणि उत्सर्जन नियमांमुळे हा निर्णय घेण्यात आला आहे. ही कार बंद झाल्यानंतर तिची जागा भरून काढण्यासाठी मारुतीनं अल्टो के 10 नव्या रूपात लाँच केली आहे.

होंडा कंपनीनं 2023 हे वर्ष सरताना त्यांच्या लाइनअपमधल्या काही कार्सची मॉडेल्स बंद करण्याचा निर्णय घेतला आहे. त्यात होंडा सिटी डिझेल, चौथ्या पिढीतली सिटी आणि अमेझ डिझेल या मॉडेल्सचा समावेश आहे. चौथ्या पिढीतल्या सिटीने पाचव्या पिढीत जाण्याचा निर्णय घेतला आहे. अमेझ डिझेलला उत्सर्जनाच्या समस्यांचा सामना करावा लागला होता.