डिझेल घेतलं अन् बायकोला पेटवून दिलं, संशयाच्या भूताने कुटुंब उद्ध्वस्त केलं, सांगली हादरली!

संजय बयाजी बेंगडे (वय-53) असे आरोपी पतीचे नाव असून, त्याच्या हल्ल्यात अनिता संजय बेंगडे (वय-40) यांचा मृत्यू झाला. संजयला दारूचे व्यसन होते आणि याच व्यसनापायी तो अनिताच्या चारित्र्यावर संशय घेत तिला नेहमी मारहाण करत असे. गुरुवारी (11 सप्टेंबर) रात्री अनिता घरात स्वयंपाक करत असताना, संजयने तिच्याशी वाद घालण्यास सुरुवात केली. वाद विकोपाला गेल्यानंतर त्याने शिवीगाळ करत अनिताला मारहाण केली. रागाच्या भरात त्याने चूल पेटवण्यासाठी आणलेले डिझेल तिच्या अंगावर ओतले आणि तिला पेटवून दिले. या घटनेत अनिता सुमारे 70 टक्के भाजली.

गंभीर अवस्थेत तिला तातडीने कराड आणि नंतर सांगलीच्या सिव्हिल हॉस्पिटलमध्ये उपचारासाठी दाखल करण्यात आले. मात्र, तिची प्रकृती चिंताजनक बनत गेली आणि रविवारी पहाटे उपचारादरम्यान तिचा मृत्यू झाला. अनिताने मृत्यूपूर्वी दिलेल्या जबाबानुसार पोलिसांनी पती संजय बेंगडेविरोधात गुन्हा दाखल करून त्याला अटक केली आहे. या घटनेनंतर पोलीस उपविभागीय अधिकारी अरुण पाटील आणि सहायक पोलीस निरीक्षक राहुल अतिग्रे यांनी घटनास्थळाला भेट दिली असून, पुढील तपास सुरू आहे.