फेमस वकिलाची आत्महत्या, पोलिसांच्या तपासात धक्कादायक 'लिंक'; माजी क्लायंटकडून पत्नीचे लैंगिक शोषण केल्याचा आरोप अन्...

जॉयला गेल्या वर्षी ऑक्टोबरमध्ये एर्नाकुलम ग्रामीण पोलिसांनी हत्येच्या प्रयत्नाच्या एका प्रकरणात अटक केली होती. जेव्हा तो तुरुंगात होता, तेव्हा त्याच्या पत्नीने या प्रकरणात कायदेशीर मदत मागण्यासाठी मनू यांच्याशी संपर्क साधला होता. जामीन मिळाल्यानंतर जॉयने मनू यांच्यावर आपल्या पत्नीचे लैंगिक शोषण केल्याचा आरोप केला आणि नंतर कथितरित्या वकिलाला सांगितले की जर त्याने माफी मागितली तर हे प्रकरण मिटू शकते, असे पोलिसांनी सांगितले.

लैंगिक शोषणाचे नवीन प्रकरण समोर आल्यास आपली सध्याची जामीन रद्द होऊ शकते या भीतीने मनू त्यांच्या पत्नी आणि बहिणीसोबत जॉयच्या घरी गेले होते. तेथे त्यांना जॉयच्या पत्नीची माफी मागण्यास भाग पाडले गेले, असे पोलिसांनी सांगितले.

मूळचे एर्नाकुलम जिल्ह्यातील पिरावोमचे रहिवासी असलेले मनू यांच्यावर एका महिलेवर बलात्कार केल्याच्या आरोप होता. संबंधित महिला कायदेशीर मदतीसाठी त्यांच्याकडे आली होती. अलीकडेच सर्वोच्च न्यायालयाने त्यांना या प्रकरणात जामीन मंजूर केला होता. दरम्यान एक व्हिडिओ समोर आला होता. ज्यामध्ये मनू आणि त्यांच्या कुटुंबातील सदस्य कथित अत्याचाराच्या आरोपांसंदर्भात माफी मागण्यासाठी एका अन्य महिलेच्या घरी गेले होते. यानंतर ते गंभीर मानसिक तणावात होते, असे पोलिसांनी सांगितले.