VIDEO: लग्नाला जाताना भररस्त्यात उडाला भडका, वऱ्हाड्यांना घेऊन जाणारी बस जळून खाक

मिळालेल्या माहितीनुसार, ही बस लग्नाचं वऱ्हाड घेऊन धुळ्याहून शहादाकडे जात होतं. दरम्यान, या खाजगी लक्झरी बसला डांगुर्णे गावाजवळ अचानक आग लागली. बसला आग लागल्याचं लक्षात येताच चालकाने तत्काळ रस्त्याच्या कडेला बस थांबवली आणि बसमधील प्रवाशांना खाली उतरवलं. यानंतर काही क्षणातच आगीने रौद्ररूप धारण केलं आणि संपूर्ण बस आगीच्या कचाट्यात सापडली.

ही आग इतकी भयंकर होती, की वऱ्हाड्यांना बसमधील आपलं सामान काढायलाही वेळ मिळाला नाही. वऱ्हाड्यांचं सर्व सामान बससह जळून खाक झालं आहे. या भीषण आगीचा व्हिडीओ आता सोशल मीडियावर व्हायरल होत आहे. सुदैवाची बाब म्हणजे या दुर्घटनेत कोणतीही जिवीतहानी झाली नाही. आता ही आग नेमकी कशामुळे लागली याची अधिकृत माहिती समजली नसली तरी शॉर्ट सर्कीटमुळे ही आग लागल्याचं सांगण्यात येत आहे.

एक लक्झरी बसला आग लागल्याची माहिती कळताच धुळे महापालिकेच्या अग्निशमन दलाच्या कर्मचाऱ्यांनी घटनास्थळी धाव घेतली. यानंतर त्यांनी आगीवर नियंत्रण मिळवलं आहे. पण भररस्त्यात अशाप्रकारे बसला आग लागल्याने रस्त्यावर बराच वेळ वाहतूक सेवा विस्कळीत झाली होती. आगीचे भडके उडत असल्याने अनेक वाहनं बसपासून काही अंतरावर थांबली होती. या घटनेची दखल पोलिसांनी घेतली आहे. पुढील तपास केला जात आहे.