व्हॉट्सॲपर मेसेज आला अन् बँक खातं रिकामं, सावधान! तुमच्यासोबतही असं होऊ शकतं, काय कराल?

सायबर गुन्हेगारांकडून नागरिकांना व्हॉट्सॲप किंवा एसएमएसद्वारे ‘तुमच्या वाहनाचे चलान बाकी आहे’, ‘ई-चलान डिटेल पाहण्यासाठी अॅप डाउनलोड करा’ अशा स्वरूपाचे मेसेज पाठवले जात आहेत. या मेसेजसोबत एपीके फाइल, पीडीएफ किंवा झीप फाइलची लिंक दिली जाते. संबंधित लिंकवर क्लिक करताच ती फाइल आपोआप मोबाइलमध्ये इन्स्टॉल होते. ही फाइल अधिकृत अॅप नसून, एक प्रकारचे धोकादायक स्पायवेअर असल्याचे सायबर तज्ज्ञांनी स्पष्ट केले आहे.

एकदा हे ॲप मोबाइलमध्ये इन्स्टॉल झाले की, ते मोबाइलवरील ओटीपी, बँकिंग ॲप्स, पासवर्ड, मेसेजेस तसेच कॉन्टॅक्ट लिस्टवर पूर्ण नियंत्रण मिळवते. त्यानंतर सायबर चोर काही वेळातच पीडिताच्या बँक खात्यातून परस्पर पैसे काढतात. अनेकदा फसवणूक झाल्याचे लक्षात येईपर्यंत मोठे आर्थिक नुकसान झालेले असते.

पोलीस आणि सायबर तज्ज्ञांनी नागरिकांना सतर्क राहण्याचे आवाहन केले आहे. वाहतूक पोलिसांचे अधिकृत ई-चलान केवळ सरकारच्या अधिकृत वेबसाईटवर किंवा अधिकृत ॲपवरच उपलब्ध असते. अनोळखी नंबरवरून आलेले चलानचे मेसेज, लिंक किंवा फाइल्स उघडणे धोकादायक ठरू शकते.

एपीके, पीडीएफ किंवा झीप फाइल्स डाउनलोड अथवा ओपन करू नका.

गुगल प्ले स्टोअरशिवाय कोणतेही ॲप मोबाइलमध्ये इन्स्टॉल करू नका.

संशयास्पद ॲप आढळल्यास तात्काळ डिलीट करा.

फसवणूक झाल्याचे लक्षात येताच त्वरित 1930 या सायबर हेल्पलाइनवर संपर्क साधावा किंवा cybercrime.gov.in या संकेतस्थळावर तक्रार नोंदवावी, असे आवाहन पोलिसांनी केले आहे. वाढत्या डिजिटल व्यवहारांच्या काळात नागरिकांनी अधिक जागरूक राहणे गरजेचे असल्याचेही तज्ज्ञांनी नमूद केले आहे.