नियतीचा अजब खेळ! 5 वर्षांचा संसार, 2 मुलांची आई... पण अल्पवयीन; दुसऱ्यांदा बाप होणाऱ्या पतीवर 'पोक्सो'चा गुन्हा

आपल्या गर्भवती पत्नीला घेऊन तो तरुण रुग्णालयात पोहोचला. डॉक्टरांनी तपासणी करताना सहजच पत्नीचे वय विचारले. अशिक्षित असल्याने तिला आपले नेमके वय सांगता आले नाही. डॉक्टरांना संशय आल्याने त्यांनी कागदपत्रांची तपासणी केली, तेव्हा एक धक्कादायक सत्य समोर आले. पाच वर्षांपासून संसार करणारी आणि दुसऱ्यांदा आई होणारी ती विवाहिता केवळ 17 वर्षांची होती.

हे सत्य समोर येताच कायद्याची चक्रे फिरू लागली. डॉक्टरांनी तातडीने याची माहिती पोलिसांना आणि समाजकल्याण विभागाला दिली. अल्पवयीन मुलीसोबत शारीरिक संबंध ठेवणे हा 'पोक्सो' कायद्यांतर्गत गंभीर गुन्हा असल्याने, पोलिसांना कारवाई करणे भाग होते. नियतीचा खेळ इतका विचित्र की, ज्या पत्नीने पतीसोबत सुखी जीवनाची स्वप्ने पाहिली होती, तिलाच आपल्या पतीविरोधात तक्रार देण्यासाठी पोलीस ठाण्याची पायरी चढावी लागली.

एकीकडे पतीच्या प्रेमाचे पाश, दुसरीकडे पोटात वाढणारे बाळ आणि समोर कायद्याचा बडगा; या चक्रव्यूहात अडकलेल्या त्या अल्पवयीन मातेची अवस्था दयनीय झाली होती. डॉक्टरांच्या मते, कमी वयात गर्भधारणा झाल्याने तिच्या आणि बाळाच्या जीवालाही धोका होता. या एका घटनेने सुखी संसाराची स्वप्ने पाहणाऱ्या त्या कुटुंबावर आभाळच कोसळले असून, पतीवर गुन्हा दाखल झाल्याने त्यांचे भविष्य अंधारात सापडले आहे.