ट्रेनी डॉक्टरचा आधी गळा दाबला, नंतर बलात्कार; त्या रात्री संजय रॉयने काय केलं? पॉलीग्राफ टेस्टमध्ये खुलासा

संजय रॉय ट्रेनी डॉक्टरवर बलात्कार करण्याच्या आधी कोलकात्यातील दोन रेड लाइट एरियामध्येही गेला होता. तिथे तो फक्त फिरून आला असंही त्याने सांगितलं. याशिवाय एका मुलीची छेड काढल्याचंही मान्य केलं. ही घटना सीसीटीव्हीमध्ये कैद झालीय. संजय रॉयने त्या रात्री गर्लफ्रेंडला व्हिडीओ कॉल केला होता आणि तिच्याकडे न्यूड फोटोही मागितले होते.

ट्रेनी डॉक्टरवर ८ ऑगस्टच्या रात्री बलात्कार करून तिची हत्या करण्यात आली. त्या रात्री संजय रॉय मित्रासोबत मित्राच्या भावाबद्दल माहिती घेण्यासाठी आरजी कर मेडिकल कॉलेजमध्ये पोहोचला होता. त्याच्या भावाला रुग्णालयात दाखल केलं होतं. रात्री सव्वा अकरा वाजता रॉय आणि त्याचा मित्र रुग्णालयातून निघाले. दारु पिण्यासाठी ते गेले आणि रस्त्याच्या कडेलाच प्यायला बसले.

दारु प्यायल्यानंतर संजय रॉय आणि त्याचा मित्र कोलकात्यातील रेड लाइट एरिया सोनागाछी इथं गेले. तिथून ते दक्षिण कोलकात्यातील दुसरा रेड लाइट एरिया असलेल्या चेतला इथं गेले. चेतला भागात जाताना दोघांनी एका मुलीची छेडही काढली होती. चेतलामध्ये संजय रॉयचा मित्र एका महिलेसोबत गेला. तेव्हा संजय रॉय बाहेरच गर्लफ्रेंडसोबत व्हिडीओ कॉलवर बोलत राहिला.

संजय रॉय आणि त्याचा मित्र तिथून पुन्हा आरजी कर मेडिकल कॉलेजला परतले. रॉय या ठिकाणी चौथ्या मजल्यावर ट्रॉमा सेंटरला गेला. पहाटे चार वाजण्याच्या सुमारास सीसीटीव्ही फुटेजमध्ये दिसतं की, रॉय तिसऱ्या मजल्यावर असलेल्या सेमिनार हॉलच्या कॉरिडोरमध्ये जात आहे. रॉय सेमिनार हॉलमध्ये जिथं पीडिता झोपली होती तिथे गेला. तिथे पीडितेचा गळा दाबला आणि त्यानंतर तिच्यावर बलात्कार केला. संजय रॉय यानंतर कोलकाता पोलीस अधिकारी असलेल्या अनुपम दत्ता यांच्या घरी जाऊन झोपला.

आरजी कर मेडिकल कॉलेजच्या सेमीनार हॉलमध्ये ३१ वर्षीय ट्रेनी डॉक्टरचा मृतदेह आढळल्यानंतर दुसऱ्या दिवशी संजय रॉयला अटक करण्यात आली होती. महिला डॉक्टरच्या शेजारी एक ब्लुटूथ डिव्हाइस आढळलं होतं, त्यावरून संजय रॉयला अटक केली गेली.