चिमुकल्याने बदाम गिळलं, करावी लागली सर्जरी; मुलांच्या घशात काही अडकल्यावर लगेच काय करायचं? डॉक्टरांचा VIDEO

लहान मुलं म्हटली की खेळता खेळता काहीही तोंडात घालणं, अशी कितीतरी प्रकरणं आहेत. छत्रपती संभाजीनगरमधील प्रकरणात तर एक वर्षाच्या मुलाने बदामाचा तुकडा गिळला होता आणि त्याच्या पालकांना माहिती नव्हती. त्याला खोकला, ताप येत होता, त्याचा श्वास गुदमरू लागाल. तब्बल सात दिवसांपासून त्याची प्रकृती खालावली. त्यानंतर त्याला रुग्णालयात नेलं. तिथं तपासणीत त्याच्या डाव्या फुफ्फुसात बदामाचा तुकडा अडकल्याचं समजलं.

या मुलावर तातडीने शस्त्रक्रिया करण्यात आली. दुर्बिणीद्वारे (ब्रोन्कोस्कोपी) विशेष चिमट्याच्या सहाय्याने फुफ्फुसात अडकलेला बदामाचा तुकडा यशस्वीरित्या बाहेर काढण्यात आला. वेळेवर उपचार मिळाल्यामुळे बालकाचा जीव वाचला.

डॉक्टरांनी सांगितल्यानुसार मुलाच्या हनुवटीला सपोर्ट द्या आणि त्याच्या पाठीवर हाताने पाच वेळा मारा. यानंतर मूल रडायला लागलं किंवा त्याच्या तोंडातून काही बाहेर येत असेल तर काही करायची गरज नाही. पण तरी मुलाने जे काही गिळलं आहे ते बाहेर आलं नाही तर हीच पद्धत 3 वेळा रिपीट करू शकता.

या पद्धतीने जर मुलाने गिळलेलं बाहेर आलं नाही तर त्याला पाठीला सपोर्ट द्या आणि छातीच्या मधोमध 4 बोटांनी 3 वेळा दाब द्या. याचाही काही परिणाम झाला नाही तर मात्र तुम्ही डॉक्टरांकडे जा, असा सल्ला त्यांनी दिला आहे.