whisky: भारतात तयार झाली व्हिस्की; एका बाटलीच्या किंमतीत येईल कार, आता उरले फक्त 2 खंबे!

रेडिको खेतानचे व्यवस्थापकीय संचालक अभिषेक खेतान म्हणाले की, `रामपूर सिग्नेचर रिजर्व्ह ब्रँडच्या केवळ 400 बाटल्या तयार करण्यात आल्या होत्या. आणि त्यापैकी आता फक्त दोन बाटल्या हैदराबादमध्ये ड्युटी फ्री शॉपमध्ये उपलब्ध आहेत, हे सांगताना आम्हाला अतिशय आनंद होत आहे. ही केवळ व्हिस्की नव्हे, तर भारतीय हस्तकौशल्य आणि परंपरेचं हे प्रतिनिधित्व आहे. कौतुकानं भेट म्हणून देण्यासाठी आणि कलेक्शन म्हणून स्वतःजवळ ठेवण्यासाठी सर्वोत्तम गुणवत्ता अनुभवणाऱ्यांसाठी हे मद्य सर्वोत्तम आहे आणि याचा अनुभव घेण्यासाठी रेडिको खेतान इच्छुकांना/कलेक्शन करणाऱ्यांना निमंत्रित करत आहे.`

सिंगल माल्ट व्हिस्की म्हणजे जी एकाच डिस्टिलरीमध्ये फक्त माल्ट केलेल्या बार्लीपासून तयार केली जाते. भिजवलेली बार्ली आधी अंकुरित केली जाते त्यानंतर ती वाळवली जाते आणि नंतर ती बारीक करून शिजवली जाते. या प्रक्रियेमध्ये तयार होणाऱ्या स्टार्चला साखरेत परिवर्तित केलं जातं. कालांतरानं आंबवण्याच्या प्रक्रियेदरम्यान ती अल्कोहोलमध्ये परिवर्तित होते. सिंगल माल्ट व्हिस्कीला सहसा ओक बॅरलमध्ये जतन केलं जातं. जतन करण्याच्या या प्रक्रियेदरम्यान व्हिस्कीमध्ये ओकचे गुण उतरतात. यामुळं व्हिस्कीमध्ये खास फ्लेवर तयार होतात. कमीत कमी तीन वर्षं आणि जास्तीत जास्त कितीही वर्षं ही व्हिस्की जतन केली जाते. जेवढी जास्त जतन केलेली असेल तेवढी तिची किंमत जास्त असते. अलीकडेच मुंबईत ड्यूटी फ्रीमध्ये बोमोर 1965ची एक बाटली 42 लाख रुपये किमतीत विकली गेली होती. रामपूर सिग्नेचर रिजर्व्हने ही गोष्ट पुन्हा एकदा अधोरेखित केली आहे की, सहाजिकच सिंगल माल्टची मागणी करणारे ग्राहकही कमी नाहीत.

रेडिको खेतान लिमिटेड भारतात आयएमएफएलचा सगळ्यात जुना आणि मोठ्या निर्मात्यांपैकी एक आहे. सुरुवातीला रामपूर डिस्टिलरीच्या रूपात ओळखल्या जाणाऱ्या रेडिको खेतान कंपनीनं 1943मध्ये कामाला सुरुवात केली. गेल्या काही वर्षांत ही कंपनी अन्य स्पिरिट निर्मात्यांसाठी प्रमुख घाऊक स्पिरिट सप्लायर आणि बॉटलरच्या रूपात उदयास आली आहे. कंपनीने 1998मध्ये 8 पीएम व्हिस्कीची सुरुवात केली आणि नंतर स्वतःच्या ब्रँडची निर्मिती केली. रेडिको खेतान ही भारतातल्या अशा काही कंपन्यांमधली एक आहे, ज्यांनी आपला संपूर्ण ब्रँड पोर्टफोलियो विकसित केला आहे. ही कंपनी भारतातल्या अल्कोहोलिक पेय पदार्थांमध्ये सगळ्यात मोठ्या एक्स्पोर्टर्सपैकी एक आहे. याचे ब्रँड जगभरातल्या 102 देशांपेक्षा अधिक ठिकाणी उपलब्ध आहेत.