Golden Milk Benefits: गाढविणीचं महाग दूध परवडत नाही, मग प्या ‘हे’ गोल्डन मिल्क, राहाल एकदम फिट

नावावरून तुम्हाला असं वाटत असेल की, ज्या दुधात सोन्याचा अर्क असतो ते ‘गोल्डन मिल्क’ असेल तर तुम्ही चुकीचा विचार करत आहात. ‘गोल्डन मिल्क’या दुधात जरी सोनं नसलं तरीही सोन्यासारखे फायदे हे दूध नक्कीच देऊ शकतं. मुख्य म्हणजे दुधाची किंमत तुम्हाला परवडणारी असेल. आयुर्वेदातलं सोनं असा हळदीचा उल्लेख केला जातो. कारण हळदीमध्ये अँटी-इंफ्लेमेटरी, अँटी-ऑक्सिडंट्स आणि अँटी-डायबेटिक गुणधर्म आहेत जे विविध औषधांमध्ये असतात. म्हणूनच दुधात हळद टाकून ते दूध गरम करून प्यायल्यास आरोग्याला अनेक फायदे होतील.

हळदीचे दूध आरोग्यासाठी फायदेशीर मानलं जातं. सर्दी, खोकल्यासारख्या आजारांवर घरगुती उपाय म्हणून हळदीचं दूध पिण्याचा सल्ला दिला जातो. हळद उत्तम नैसर्गिक प्रतिजैविक (Natural Antibiotic) मानली जाते. हळदीचं दूध प्यायल्यामुळे त्वचेपासून ते पोटापर्यंत अनेक आजारांवर ते गुणकारी ठरतं. दुधामध्ये कॅल्शियम, प्रोटीन्स आणि विविध जीवनसत्त्वांसारखे पौष्टिक घटक असतात. दूध प्यायल्यामुळे शरीराला शक्ती मिळून तणाव दूर व्हायला मदत होते. याशिवाय दुधामुळे हाडं मजबूत होतात. दुधात हळद मिसळ्याने त्याचे फायदे अनेक पटींनी वाढतात.

हृदय रोग: हळदीच्या दुधामुळे रक्तदाब नियंत्रणात राहून हृदयाचं आरोग्य सुधारतं. त्यामुळे हृदयविकार आणि हार्ट ॲटॅकची भीती कमी होते.

डायबिटीस: हळदीच्या औषधी गुणधर्मांमुळे रक्तातली साखर नियंत्रित राहायला मदत होते. त्यामुळे डायबिटीस असणाऱ्या व्यक्तींसाठी हळदीचं दूध पिणं फायद्याचं आहे.

वेदनाशमक : हळदीत अँटी-इंफ्लेमेटरी म्हणजेच दाहकविरोधी गुणधर्म आहेत. त्यामुळे कोणत्याही दुखण्यावर किंवा गुडघेदुखी आणि सूज कमी करण्यासाठी हळदीच्या दुधाचा फायदा होऊ शकतो.

पचनास फायदेशीर: हळदीच्या दुधात असलेले अँटी-ऑक्सिडंट्स आणि अँटी-इंफ्लेमेटरी गुणधर्म पचनक्रिया सुधारतात. त्यामुळे आतड्यांवर कमी ताण येऊन आतड्यांचं आरोग्य चांगलं राहायला मदत होते.