Diabetes Tips : अचानक दृष्टी आणि वजन कमी होतंय? दुर्लक्ष टाळा, असू शकते 'टाइप 1.5 डायबिटीज'चे लक्षण!

क्लीव्हलँड क्लिनिकच्या अहवालानुसार टाइप 1.5 डायबिटीजला वैद्यकीय भाषेत लेटेंट ऑटोइम्यून डायबिटीज इन अडल्ट्स (LADA) असे म्हटले जाते. याची लक्षणे साधारणपणे 30 ते 50 वर्षांच्या दरम्यान दिसू लागतात. सुरुवातीला रुग्णांना जास्त तहान लागणे, वारंवार लघवी होणे, अचानक वजन कमी होणे, थकवा येणे आणि धूसर दिसणे अशी लक्षणे जाणवतात. ही लक्षणे टाइप 2 डायबिटीजसारखी असल्याने अनेकदा डॉक्टरही सुरुवातीला याला टाइप 2 समजून उपचार सुरू करतात.

LADA हा एक ऑटोइम्यून आजार आहे, ज्यामध्ये शरीर अशा अँटीबॉडीज तयार करते, ज्या पॅनक्रियाजमधील इन्सुलिन तयार करणाऱ्या बीटा पेशींना हळूहळू नष्ट करतात. फरक इतकाच की टाइप 1 मध्ये ही प्रक्रिया खूप वेगाने होते आणि लहानपणी किंवा किशोरावस्थेतच दिसून येते, तर टाइप 1.5 मध्ये ही प्रक्रिया हळूहळू घडते. या आजाराच्या सुरुवातीच्या टप्प्यात शरीर थोड्याफार प्रमाणात इन्सुलिन तयार करत राहते, त्यामुळे अनेक महिने किंवा वर्षे इन्सुलिन इंजेक्शनची गरज भासत नाही. नंतर शुगर लेव्हल नियंत्रित ठेवण्यासाठी इन्सुलिनची आवश्यकता भासते.

उपचारांबाबत बोलायचे झाल्यास, LADA चे उपचार थोडे आव्हानात्मक असतात. सुरुवातीला काही रुग्णांना तोंडी औषधांनी फायदा होतो, पण हळूहळू पॅनक्रियाजची इन्सुलिन तयार करण्याची क्षमता कमी होत जाते. अखेरीस इन्सुलिन घेणे आवश्यक ठरते. अनेक तज्ज्ञांचे मत आहे की LADA मध्ये लवकर इन्सुलिन सुरू केल्यास पॅनक्रियाजमधील उरलेल्या पेशी जास्त काळ सुरक्षित राहू शकतात. त्यामुळे टाइप 1.5 चा योग्य उपचार न झाल्यास ही स्थिती अधिक गंभीर होऊ शकते.