उन्हाळ्यात तुम्ही जिम जॉईन करण्याचा विचार करताय? या 7 गोष्टी वाचा, होईल फायदा Video

जिम जॉईन करण्यापूर्वी सर्वप्रथम तुम्हाला स्वतःला प्रश्न विचारावा लागेल की, तुम्ही जिम का जॉईन करत आहात? अभिजीत मोरे यांच्या मते, प्रत्येक व्यक्तीचं फिटनेसचं उद्दिष्ट वेगळं असतं. काहींना वजन कमी करायचं असतं, काहींना मसल्स वाढवायच्या असतात, तर काही जण फक्त सक्रिय आणि निरोगी राहण्यासाठी जिमला प्राधान्य देतात. तुमचं उद्दिष्ट स्पष्ट असेल, तर तुम्हाला त्या दिशेने काम करणारा जिम आणि ट्रेनर निवडणं सोपं जाईल. जर तुम्हाला वजन कमी करायचं असेल, तर कार्डिओ मशीन्स आणि ग्रुप ऍक्टिव्हिटीजवर भर देणारा जिम तुमच्यासाठी योग्य ठरेल. दुसरीकडे, मसल्स बिल्डिंगसाठी वेट ट्रेनिंग आणि स्ट्रेंथ मशीन्स असणारा जिम निवडावा लागेल. म्हणूनच, पहिली पायरी म्हणून तुमचं ध्येय निश्चित करणं गरजेचं आहे.

जिम निवडताना घाई करणं टाळावं. तुमच्या घराजवळ अनेक जिम्स असतील, पण प्रत्येक जिम तुमच्या गरजेनुसार असेलच असं नाही. जिममध्ये कोणत्या सुविधा आहेत, याचा सखोल अभ्यास करणं गरजेचं आहे. यामध्ये मशीन्सची उपलब्धता, स्वच्छता, सुरक्षितता आणि अतिरिक्त सुविधांचा समावेश होतो. काही जिम्समध्ये योगा क्लासेस, झुंबा सेशन्स किंवा डाएट काउन्सेलिंग तसेच 24 तास चालू राहणाऱ्या आणि त्याचबरोबर वेगवेगळ्या ऍक्टिव्हिटीज असणाऱ्या जिम मोठ्या प्रमाणात उपलब्ध आहेत, ज्या तुमच्या फिटनेसच्या प्रवासाला पूरक ठरू शकतात. त्याचबरोबर, जिमची जागा हवेशीर आहे की नाही, लॉकर रूम्स आणि शॉवर रूम्स स्वच्छ आहेत का, याकडेही लक्ष द्यावं. अभिजीत यांनी असंही सुचवलं की, जिमला एकदा भेट देऊन ट्रायल सेशन घ्या. तिथलं वातावरण आणि सुविधा तुम्हाला पटतात का, हे प्रत्यक्ष अनुभवूनच ठरवा.

जिममधलं वातावरण तुमच्या व्यायामाच्या अनुभवावर मोठा परिणाम करतं. प्रेरणादायी आणि सकारात्मक वातावरण असलेल्या जिममध्ये तुम्हाला दररोज जावंसं वाटेल, असा असावा. जिथे लोक एकमेकांना प्रोत्साहन देतात, संगीत योग्य आणि उत्साहवर्धक आहे आणि जागा हवेशीर आहे, तिथे व्यायामाचा आनंद वाढतो. उलट, जर जिममध्ये गोंगाट असेल, अस्वच्छता असेल किंवा बंदिस्त आणि उदास वातावरण असेल, तर तुमची प्रेरणा कमी होऊ शकते. काही जिम्समध्ये खूप गर्दी असते, ज्यामुळे मशीन्ससाठी वाट पाहावी लागते. अशा ठिकाणी तुमचा वेळ आणि मेहनत दोन्ही वाया जाऊ शकतात, म्हणूनच जिमचं वातावरण तुमच्या स्वभावाला आणि गरजांना अनुरूप आहे की नाही, हे तपासून पाहावं.

जिममधील कर्मचारी वर्ग आणि ट्रेनर्स हे तुमच्या यशाचं महत्त्वाचं सूत्रधार असतात. ट्रेनर्स आणि स्टाफ प्रशिक्षित आणि अनुभवी असावेत. ट्रेनरला व्यायामशास्त्राची चांगली माहिती असणं आवश्यक आहे. त्याचबरोबर, ते तुमच्या वैयक्तिक गरजांनुसार मार्गदर्शन करू शकतील, असा आत्मविश्वास त्यांच्यात हवा. एक चांगला ट्रेनर तुम्हाला योग्य व्यायामाची तंत्रं शिकवेल, तुमच्या प्रगतीवर लक्ष ठेवेल आणि गरजेनुसार तुमच्या वर्कआउट प्लॅनमध्ये बदल करेल. तसंच, स्टाफचा स्वभाव मैत्रीपूर्ण आणि सहाय्यक असावा. नवख्या व्यक्तींना जिममध्ये सुरुवातीला काहीसं अवघडल्यासारखं वाटतं. अशा वेळी स्टाफने त्यांना आधार देणं महत्त्वाचं असतं, असं अभिजीत यांचं मत आहे. म्हणूनच जिम निवडताना तिथल्या ट्रेनर्स आणि स्टाफशी बोलून त्यांची कार्यशैली आणि दृष्टिकोन समजून घ्यावा.

जिममधील मशीन्स आणि उपकरणं ही तुमच्या व्यायामाची गुणवत्ता ठरवतात. आधुनिक आणि सुरक्षित मशीन्स असलेला जिम निवडा, त्यांच्या मते, मशीन्स नियमितपणे दुरुस्त आणि स्वच्छ ठेवल्या गेल्या पाहिजेत. कार्डिओ मशीन्स जसं ट्रेडमिल, सायकलिंग मशीन, तसंच वेट ट्रेनिंगसाठी डंबेल्स, बारबेल्स आणि फंक्शनल ट्रेनिंगसाठी केटलबेल्स अशा विविध उपकरणांची उपलब्धता असावी, मशीन्सची संख्या हीसुद्धा महत्त्वाची बाब आहे. गर्दीच्या वेळी मशीन्ससाठी वाट पाहावी लागणार नाही, याची खात्री करा, असा सल्ला ते देतात. तसंच, मशीन्स वापरताना सुरक्षिततेच्या दृष्टिकोनातून ट्रेनरचं मार्गदर्शन उपलब्ध असावं. काही जिम्समध्ये जुनाट मशीन्स असतात, ज्यामुळे दुखापतीचा धोका वाढतो. अशा ठिकाणांपासून सावध राहा.

जिममध्ये स्वच्छता आणि सुरक्षितता या दोन बाबींकडे दुर्लक्ष करून चालणार नाही. जिथे स्वच्छता नाही, तिथे रोगराईचा धोका असतो. विशेषतः घामामुळे जिममध्ये बॅक्टेरिया वाढण्याची शक्यता असते, मशीन्स, मॅट्स आणि लॉकर रूम्स स्वच्छ ठेवणं ही जिम व्यवस्थापनाची जबाबदारी आहे. त्याचबरोबर, सुरक्षिततेच्या दृष्टिकोनातून जिममध्ये प्रथमोपचार किट, अग्निशामक यंत्र आणि आपत्कालीन संपर्क क्रमांक उपलब्ध असावेत. व्यायाम करताना दुखापत झाल्यास तात्काळ उपचार मिळणं गरजेचं आहे. 

जिम जॉईन करण्यापूर्वी तुमचं बजेट आणि वेळेचं नियोजनही महत्त्वाचं आहे. प्रत्येक जिमचं शुल्क वेगळं असतं. तुमच्या खिशाला परवडेल असा जिम निवडा, पण त्याचबरोबर गुणवत्तेशी तडजोड करू नका, तसंच, जिमची वेळ तुमच्या दैनंदिन दिनचर्येशी जुळणारी असावी. जर जिम तुमच्या ऑफिसपासून किंवा घरापासून खूप लांब असेल, तर तुम्ही नियमितपणे जाऊ शकणार नाही, अलीकडच्या काही काळात 24 तास आणि वर्षाचे 365 दिवस चालू राहणारे जिम अस्तित्वात आले आहेत.

एखादी नवखी व्यक्ती जिम जॉईन करत असेल तर त्याने सगळ्यात पहिल्यांदा जिम निवडताना घाई करू नये. त्यांनी आपल्या आसपासच्या जिम्सना भेट द्या, ट्रायल सेशन घ्या आणि तुम्हाला कुठे कम्फर्टेबल वाटतं हे पाहा. चांगला ट्रेनर आणि योग्य वातावरण तुम्हाला तुमच्या फिटनेसच्या प्रवासात यशस्वी करेल. जिम हे फक्त शरीरासाठी नाही, तर तुमच्या मनाला आणि आत्मविश्वासाला बळ देण्यासाठीही असावं, असं त्यांनी सांगितलं.