Pune Metro: बाप्पामुळे पुणे मेट्रोची चांदी! एकाच दिवसात 3,68,000 भाविकांनी केला प्रवास

याबाबत मिळालेल्या माहितीनुसार, यंदा डिस्ट्रिक्ट कोर्ट ते स्वारगेट मार्गावरील मेट्रो सेवा सुरू झालेली आहे. त्यामुळे गणपती पाहण्यासाठी येणारे भाविक मेट्रोचा वापर करत आहेत. पुणे मेट्रोच्या इतिहासात एका दिवसांत सर्वाधिक प्रवाशांचा नवा उच्चांक शनिवारी प्रस्थापित झाला. सध्या वनाझ ते रामवाडी आणि पिंपरी-चिंचवड ते स्वारगेट या मार्गावर मेट्रोची प्रवासी सेवा सुरू आहे. गेल्या वर्षी गणपती विसर्जनादिवशी उच्चांकी 3 लाख 46 हजार प्रवाशांनी प्रवास केला होता. यावर्षी शनिवारी 3 लाख 68 हजार प्रवाशांनी प्रवास केल्याची नोंद झाली आहे. गणपती विसर्जनाच्या दिवशी सलग 41 तास मेट्रो सुरू राहणार आहे.

महामेट्रोचे अतिरिक्त महासंचालक (जनसंपर्क) चंद्रशेखर तांभवेकर म्हणाले, "गणेशोत्सवातील देखावे पाहण्यासाठी भाविकांसाठी मेट्रो सोयीची ठरत आहे. मंडई मेट्रो स्टेशनवर होणाऱ्या गर्दीवर नियंत्रण ठेवण्यासाठी मेट्रोकडून तयारी केली गेली आहे. नागरिकांनी कसबा स्टेशनवर उतरून मध्यवर्ती भागात देखावे पाहण्यासाठी जावे. देखावे पाहिल्यानंतर मंडई स्थानकावरून परतीचा प्रवास करता येईल."