आजचं हवामान: २५ नोव्हेंबरला हवामानात होणार मोठा बदल, वादळामुळे अवकाळीचं संकट, महाराष्ट्रावर काय होणार परिणाम?

एकाच वेळी दोन ठिकाणी वादळं येणार असल्याने त्याचा परिणाम हवामानावर झाला आहे. दक्षिण भारतातील राज्यांमध्ये जोरदार पावसाचा इशारा आहे. तामिळनाडूमध्ये गेल्या २४ तासांत २१ सेंटीमीटरपेक्षा जास्त 'अतिमुसळधार' पाऊस नोंदवला गेला आहे. केरळ आणि तामिळनाडूसाठी अतिवृष्टीचा इशारा जारी करण्यात आला आहे. लक्षद्वीप बेटे, अंदमान-निकोबार बेटे, रायल सीमा आणि किनारपट्टीवरील आंध्र प्रदेशात आज 'यलो अलर्ट'सह जोरदार पावसाची शक्यता आहे. तामिळनाडू आणि अंदमान-निकोबार बेटांवर 'ऑरेंज अलर्ट' कायम आहे, तर लक्षद्वीपमध्ये जोरदार पावसाचा इशारा आहे.

पश्चिम आणि मध्य भारताच्या तुलनेत महाराष्ट्राच्या हवामानात महत्त्वाचा बदल अपेक्षित आहे. पुढील चार दिवसांच्या (२४ ते २७ नोव्हेंबर) काळात महाराष्ट्रातील किमान तापमानात २ ते ३ अंश सेल्सियसपर्यंत हळूहळू घट होण्याची शक्यता आहे. याचा अर्थ असा की, सध्या जाणवत असलेल्या थंडीच्या तुलनेत येणाऱ्या काही दिवसांत महाराष्ट्रात गारठा वाढेल आणि नागरिकांना अधिक थंडीचा अनुभव मिळेल. त्यानंतर मात्र तापमानात कोणताही मोठा बदल अपेक्षित नाही. त्यामुळे, नागरिकांनी अचानक वाढणाऱ्या थंडीसाठी तयार राहावे, असा अंदाज हवामान विभागाने वर्तवला आहे. मुंबईसह कोकण किनारपट्टीलगतच्या भागांमध्ये दमट हवामान झालं आहे. थंडी गायब झाल्यामुळे घामाच्या धारा वाहू लागल्या आहेत. डिसेंबर महिन्यात पुन्हा थंडीचा कडाका वाढणार असल्याची माहिती मिळाली आहे.

उत्तर-पश्चिम भारतात पुढील चार दिवसांत किमान तापमानात २ ते ४ अंश सेल्सियसची लक्षणीय घट होण्याची शक्यता आहे, ज्यामुळे या भागांमध्ये थंडीचा कडाका वाढेल. दुसरीकडे, पश्चिम उत्तर प्रदेशात आज आणि उद्या दाट धुक्याची शक्यता वर्तवण्यात आली आहे. देशाच्या उर्वरित भागांमध्ये किमान तापमानात कोणताही मोठा बदल होण्याची शक्यता नाही.

बंगालच्या उपसागरामध्ये हवामान प्रणाली सक्रिय होत असल्याने, समुद्रातील परिस्थिती अत्यंत धोकादायक बनली आहे. मच्छिमारांनी आजपासून पुढील पाच दिवसांपर्यंत मासेमारीसाठी खोल समुद्रात न जाण्याचं आवाहन केलं आहे. जे खोल समुद्रात गेले आहेत त्यांनी तातडीनं मागे फिरावं असं आवाहन करण्यात आलं आहे. डिसेंबर महिन्यात पुन्हा एकदा थंडीचा कडाका वाढण्याची शक्यता आहे.