साधू आले गेले आम्हाला फरक पडत नाही, पण... सयाजी शिंदेंनी गिरीश महाजनांना ठणकावलं

कुंभमेळ्यासाठी साधूंच्या निवासाकरिता नाशिकच्या तपोवनातील वृक्ष तोडीचा मुद्दा राज्यभरात गाजत आहे. नाशिकमधील पर्यावरण प्रेमी जनता आणि राज्यातील सुजाण नागरिकांनी वृक्षतोडीवर एल्गार पुकारला आहे. याच पार्श्वभूमीवर ज्येष्ठ अभिनेते सयाजी शिंदे तपोवन परिसरात आले होते. त्यांनी तपोवनाला भेट देऊन आंदोलनकर्त्यांना पाठिंबा दिला.

गिरीश महाजन तुम्ही अशी वादग्रस्ते विधाने करू नका. या जगात केवळ झाडंच सेलिब्रेटी आहेत. त्यांना संरक्षण द्या. हिडन अजेंडा राबवू नका. एकही झाड तुटता कामा नये. आपल्याच माणसांनी आपल्याच माणसांना फसवलं तर ती आपली माणसं कसं म्हणायचं, अशा कठोर शब्दात त्यांनी गिरीश महाजन यांना सुनावले.

वृक्ष तोडू नका, ही विनंती आम्ही सरकारकडे वारंवार करतो आहे. परंतु तरीही सरकार माघार घेण्याच्या मनस्थितीत नाही. तशीच वेळ आली तर आम्ही सरकारविरोधात जाणार. एकही झाड तुटू देणार नाही. नाशिकच्या पर्यावरण प्रेमींच्या बाजूने आम्ही आहोत. सह्याद्री देवराईच्या ४० देवराई आहेत, आम्हा सगळ्यांच्या वतीने नाशिककरांच्या आंदोलनाला आमचा पाठिंबा आहे. कुठेही झाड तुटू द्यायचे नाही, झाड म्हणजे आपले आई बाप आहेत. साधूग्रामसाठी एकही झाड तुटू द्यायचे नाही. साधू आले गेले आम्हाला फरक पडत नाही, पण झाड गेल्याने नक्कीच पुढच्या पिढ्यांना फरक पडेल.

संत महात्म्यांचा विचार घेऊन पुढे जातोय, असे आपण सांगत असतो. मग झाड जाणे हा शिवरायांचा अपमान आहे. झाड जाणे हा संत ज्ञानेश्वर आणि संत तुकारामांचा अपमान आहे, याकडे त्यांनी सरकारचे लक्ष वेधले.