लाडका होता तो.... बारामतीत पाय ठेवताच सुप्रिया सुळेंनी टाहो फोडला, अजित पवारांचे लाड करणाऱ्या मणियार यांच्यासमोर धाय मोकलून रडल्या

महाराष्ट्राचे उपमुख्यमंत्री आणि रोखठोक नेते अजितदादा पवार यांच्या मृत्यूच्या बातमीने अनेकांना धक्का बसला. राष्ट्रवादीच्या कार्यकर्त्यांना भावना अनावर झाल्या आहेत. अनेक नेत्यांच्या तोंडून शब्दही फुटेनासे झाले आहेत. अनेकांना अश्रू अनावर झाले आहेत. बारामतीमधील वातावरण शोकाकूल झाले आहे. अनेकांसाठी हा जबरी धक्का आहे. पवार कुटुंबियांना आणि बारामतीकरांना पोरकं झाल्यासारखं वाटत आहे. दरम्यान लाडक्या दादाचं विमान अपघातात मृत्यू झाल्याची वार्ता कळताच खासदार सुप्रिया सुळे यांना मोठा धक्का बसला आहे.

अजितदादांच्या निधनाची बातमी समजल्यानंतर पत्नी सुनेत्रा पवार, जय पवार आणि खासदार सुप्रिया सुळे दिल्लीहून बारामतीत दाखल झाले. विमानतळावर पोहोचल्यावर सुनेत्रा पवार, सुप्रिया सुळे यांना अश्रू अनावर झाले. विमानतळावर दाखल झाल्यानंतर त्या ठिकाणी शरद पवार यांचे जुने सहकारी मित्र विठ्ठल शेठ मणियार उभे होते त्यांना पाहून सुळे आणि पवार यांना अश्रू अनावर झाले. विठ्ठल शेठ मणियार हे अजित पवारांच्या अतिशय जवळचे  आहेत. अजित पवार लहान असल्यापासून मणियार यांचे ते लाडके होते.  सुप्रिया सुळेंनी लाडका होता तो... काय झालं असं म्हणत टाहो फोडला. सुनेत्रा पवार आणि पार्थ पवार यांनाही अश्रू अनावर झाले. पवार कुटुंबांना पाहून यावेळी उपस्थितीत लोकांच्याही डोळ्यात पाणी आलं.

दरम्यान यावेळेस विमानतळावर राणा जगजित सिंह पाटील नेण्यासाठी आले होते. यावेळी जयंत पाटील, दादा भुसे होते. विमानतळातून बाहेर पडल्यानंतर पार्थ पवार आणि सुनेत्रा पवार बारामती हॉस्पिटलमध्ये दाखल झाले. यावेळी पार्थ पवार आणि सुनेत्रा पवार यांना पाहताच कार्यकर्त्यांनी 'अजितदादा अमर रहे'च्या घोषणा दिल्या. त्याआधी राष्ट्रवादीचे अध्यक्ष शरद पवार मुंबईतून बारामतीत हेलिकॉप्टरने दाखल झाले होते.

आजित पवारांच्या विमानाचा अपघात बारामती एअरपोर्ट पासून दोन ते तिन किलोमीटर अंतरावर झाला. विमानात ऐनवेळी झालेल्या बिघाडामुळे विमान धावपट्टीवर लँड होऊ शकले नाही. एअरपोर्ट पासून पुढे दोन ते तिन किलोमीटर अंतरावर असलेल्या उतारावरील जमिनीवर जाऊन हे विमान कोसळले. तांत्रिक बिघाडामुळे विमान धावपट्टीवर उतरण्याऐवजी शेजारी असलेल्या एका शेतात आदळलं. विमान कोसळताच क्षणार्धात भीषण पेट घेतला. बघता बघता संपूर्ण विमान आगीच्या भक्ष्यस्थानी आलं आणि जळून खाक झालं. या अपघातानंतर घटनास्थळावरून धुराचे मोठे लोट पसरले.

अजित पवारांच्या अपघाती निधनाची बातमी समजल्यानंतर कार्यकर्त्यांना अश्रू अनावर झाल्याचं पाहायला मिळत आहे. राज्यभरातून कार्यकर्ते बारामतीमध्ये दाखल झाले आहेत. आपला लाडका नेता गेल्यानं सर्वांना धक्का बसला आहे.