तुम्ही सोबत या-आपण लढू, भाजपने दणका दिल्यानंतर अजितदादांचा सतेज पाटलांना फोन

पुणे आणि पिंपरी चिंचवडच्या राजकारणावर अजित पवार यांचे निर्विवाद वर्चस्व होते. एकसंध राष्ट्रवादी असताना शरद पवार यांनी पुण्याच्या राजकारणाचा सारा कारभार अजित पवार यांच्याकडे सोपवला होता. अजित पवार यांनीही तरुण सहकाऱ्यांना सोबत घेऊन पुण्याच्या राजकारणावर हळूहळू पकड मिळवली. गेल्या २० वर्षांत अनेक सहकाऱ्यांना अजित पवार यांनी संधी दिली. पुण्याचे नागरीकरण वाढत असताना, पुणेकरांच्या प्रश्नांचा प्राधान्यक्रम बदलत असताना लोकमताची नाडी ओळखणारे सहकारी अजित पवार यांनी हेरले. यातूनच त्यांनी अनेक राजकारणी घडवले. परंतु मोदी-फडणवीस यांच्या उदयानंतर पुण्याचे राजकारणही तितक्याच वेगाने बदलले. २०१७ साली झालेल्या पालिका निवडणुकीत भाजपने राष्ट्रवादीचा धुव्वा उडवून प्रथमच महापालिका ताब्यात घेतली. अजित पवार यांच्या वर्चस्वाला बालेकिल्ल्यात हादरे देण्याची ही सुरुवात होती. आता अजित पवार जरी सत्तेत सहभागी असले तरी 'शतप्रतिशत भाजप' हा संकल्प मनात ठेवून भाजप अजित पवारांना कमजोर करण्याची एकही संधी सोडत नाहीत.

त्यामुळे २०२६ च्या महापालिका निवडणुकीत अजित पवारांनी महाविकास आघाडीला सोबत घेण्याचे प्रयत्न सुरू केले आहेत. काँग्रेसला सोबत घेण्यासाठी अजित पवार यांनी काँग्रेसचे नेते बंटी उर्फ सतेज पाटील यांच्यासोबत फोनवरून चर्चा केली. सोबत आलात तर एकत्र लढू, भाजपचा विजयी वारू रोखण्यासाठी एकत्र आले पाहिजे, अशी गळ अजित पवार यांनी बंटी पाटलांना घातल्याचे विश्वसनीय सूत्रांनी सांगितले.

पुण्यात दोन्ही राष्ट्रवादींसह महाविकास आघाडीची सोबत मोट बांधण्याचे अजित पवारांचे प्रयत्न सुरू आहेत. शरद पवार यांची राष्ट्रवादी आणि काँग्रेस सोबत आली तर भाजपला चांगली टक्कर देऊन पुणे महापालिकेचा गड पुन्हा मिळविण्याचा प्रयत्न अजित पवार यांचा असेल.

महायुतीत फोडाफोडी नको, एकमकेांच्या पक्षातील पदाधिकाऱ्यांना प्रवेश देऊन महायुतीत वाद नको, असे वरिष्ठ स्तरावर ठरलेले असतानाही भाजपने पुण्यात अजित पवार यांच्या अनेक पदाधिकाऱ्यांना प्रवेश दिले. महापालिका निवडणुकीच्या तोंडावर भाजपने केलेल्या फोडाफोडीवर अजित पवार संतापले. महायुतीच्या एकत्रित बैठकीत या विषयावर मुख्यमंत्री फडणवीस यांच्याशी बोलणार असल्याचे त्यांनी सांगितले.