Rohit Sharma : वनडे क्रिकेटमधून लवकर निवृत्ती घेण्यावर हिटमॅनचा शॉकिंग खुलासा, म्हणाला 'आपलं स्वप्न कधीच...'

अहमदाबादमध्ये ऑस्ट्रेलियाविरुद्ध झालेल्या वर्ल्ड कप फायनल मॅचनंतर रोहित पूर्णपणे खचला होता. रोहितच्या मते, त्या स्पर्धेने त्याच्या शरीरातील सर्व एनर्जी शोषून घेतली होती आणि रोहितला पुन्हा बॅट हातात पकडावी असं वाटत नव्हतं. तो अनेक दिवस लोकांपासून दूर राहिला होता, कारण लहानपणापासून पाहिलेलं स्वप्न अवघ्या काही पावलांवरून हुकलं होतं.

नुकत्याच गुडगावमध्ये पार पडलेल्या एका कार्यक्रमात बोलताना रोहितने आपल्या भावना व्यक्त केल्या. हिटमॅन म्हणाला की, तो पराभव स्वीकारणे खूप कठीण होतं, परंतु जीवन तिथंच संपत नाही याची त्याला जाणीव होती. त्याने स्वतःला पुन्हा सावरलं आणि 2024 च्या टी-20 वर्ल्ड कपवर आपले लक्ष केंद्रित केलं. जरी निवृत्तीचा विचार मनात आला होता, तरीही आपल्याला हा खेळ आवडतो आणि हे आपलं स्वप्न आहे, याची सतत जाणीव करून दिल्याने मी पुन्हा मैदानात परतू शकलो, असं म्हणत रोहितने वनडेमधील निवृत्तीवर खुलासा केला आहे.

या कठीण काळातून बाहेर पडल्यानंतर रोहितने केवळ पुनरागमनच केलं नाही, तर त्याच्या नेतृत्वाखाली भारताने 2024 चा टी-20 वर्ल्ड कप आणि 2025 ची चॅम्पियन्स ट्रॉफी देखील जिंकली. सध्या टीम इंडियाचा वनडे कॅप्टन शुभमन गिल असला तरी, रोहितने त्या कठीण प्रसंगातून सावरून देशाला मिळवून दिलेले यश अविस्मरणीय ठरले. रोहितच्या मते, मैदानावर पुन्हा परतण्यासाठी त्याला खूप मानसिक शक्ती आणि ऊर्जेचा वापर करावा लागला होता.