वडील लग्नासाठी 'वर' शोधत होते, लेकीच्या सुखी संसाराची स्वप्न विरली, शांभवीचा 'तो' संदेश अखेरचा ठरला

शांभवी पाठक हिने ग्वाल्हेर येथे पाचवीपर्यंत शिक्षण घेतले होते. लहानपणापासूनच तिला आकाशात झेप घेण्याचे स्वप्न होते. पुढील शिक्षणासाठी ती दिल्लीला गेली आणि त्यानंतर न्यूझीलंडमध्ये जाऊन तिने व्यावसायिक वैमानिकाचा परवाना मिळवला. कठोर प्रशिक्षण, शिस्त आणि मेहनतीच्या जोरावर तिने सहवैमानिक म्हणून आपली स्वतंत्र ओळख निर्माण केली होती. दिल्ली, लंडन आणि रशिया येथे तिने विविध उड्डाणांमध्ये सहभाग घेतला होता. “विमान चालवणे हेच तिचे जग होते,” असे तिच्या आजीने सांगितले.

बुधवारी दक्षिण दिल्लीतील त्यांच्या घराच्या परिसरात शोककळा पसरली होती. हसतमुख, कर्तव्यनिष्ठ आणि महत्त्वाकांक्षी शांभवीच्या जाण्याने संपूर्ण कुटुंबावर दु:खाचा डोंगर कोसळला. अपघाताची बातमी समजताच आई-वडील तातडीने पुण्याकडे रवाना झाले.

“ती आमच्यासाठी केवळ नात नव्हती, तर घराचा आधारस्तंभ होती. तिच्या आठवणी कायम आमच्या सोबत राहतील,” असे सांगताना मीरा पाठक यांचे डोळे पाणावले.