भाजपने सिंचन घोटाळा आणि कोर्ट निकालाची आठवन करून दिली, अजितदादा नरमले, म्हणाले, मी त्यांना बोललोच नव्हतो....

गोविंद वाकडे, प्रतिनिधी, पिंपरी चिंचवड : गेल्या चार दिवसांपासून भारतीय जनता पक्षावर आरोपांची राळ उडवलेले राज्याचे उपमुख्यमंत्री अजित पवार यांनी अखेर एक पाऊल मागे घेत स्थानिक नेत्यांसंबंधी मी बोलतो आहे, राज्याच्या नेत्यांवर मी टीका केलेली नाही, असे सांगून सुरू असलेल्या सुंदोपसुंदीला पूर्णविराम देण्याचा प्रयत्न केला. मी स्थानिक नेत्यांवर बोललेलो असताना माध्यमांनी चुकीच्या पद्धतीने बातम्या दाखवल्याने भाजपच्या वरिष्ठ नेत्यांनी प्रत्युत्तरे दिली, असे म्हणत अजित पवार यांनी माध्यमांवर खापर फोडण्याचा प्रयत्न केला. ७० हजार कोटींच्या सिंचन घोटाळ्याची पूर्ण चौकशी झालेली नाही, अद्याप न्यायालयात प्रकरण सुरू आहे, हे भारतीय जनता पक्षाच्या नेत्यांनी अत्यंत आक्रमकपणे सांगितल्यावर अजित पवार एक पाऊल मागे आल्याची चर्चा राजकीय वर्तुळात सुरू आहे.