आता तो कधीच म्हणणार नाही, मामाच्या गावाला जाऊया! संक्रांतीच्या आनंदावर विरजण; पतंगाने कापली १४ वर्षीय अर्णवच्या आयुष्याची दोर

मूळचा पिंपरी-चिंचवड इथला रहिवासी असलेला अर्णव काळेवाडी फाटा परिसरात राहायचा. मकरसंक्रांतीचा सण आपल्या मामाकडे साजरा करण्यासाठी तो मोठ्या आनंदाने कोपरगावला आला होता. बुधवारी सुटीचा आनंद घेण्यासाठी अर्णव आणि त्याचा मित्र ऋषिकेश वाघमारे (वय १९) घराच्या टेरेसवर पतंग उडवत होते.

अर्णव आणि त्याचे मित्र पतंग उडवण्यासाठी मांजाऐवजी पातळ लोखंडी वायडिंग तारेचा वापर करत होते. पतंग आकाशात झेपावला असताना अचानक वाऱ्याच्या वेगाने ही तार घराशेजारील उच्च दाबाच्या वीज वाहिनीला टेकली. लोखंडी तार असल्याने क्षणात विजेचा प्रवाह अर्णवच्या अंगात उतरला. या भीषण दुर्घटनेत अर्णवचा जागीच मृत्यू झाला, तर त्याला वाचवण्याच्या प्रयत्नात ऋषिकेश वाघमारे हा तरुण गंभीर जखमी झाला आहे.

मामाकडे सण साजरा करायला आलेल्या भाच्याचा असा करुण अंत झाल्याने संपूर्ण कुटुंबावर दुखाचा डोंगर कोसळला आहे. जखमी ऋषिकेशवर सध्या रुग्णालयात उपचार सुरू आहेत. या घटनेमुळे लक्ष्मीनगर परिसरात हळहळ व्यक्त होत असून, पालकांनी आपल्या मुलांकडे लक्ष देण्याचे आवाहन करण्यात येत आहे.