कोल्हापुरात पाय ठेवू देणार नाही म्हणणाऱ्यांवर ओवेसींचा हल्लाबोल, मी पाकिस्तानचा बुरखा फाडला, तुम्ही मला माझ्याच देशात येऊ देत नाही?

ज्ञानेश्वर साळोखे, प्रतिनिधी, कोल्हापूर : मी कोल्हापुरात येऊ नये म्हणून काहींनी जंग जंग पछाडलं. मला कोल्हापुरात पाय ठेवू देणार नाही अशी काहींनी गर्जना केली. पण त्यांच्या तोंडात अजून दुधाचे दातही निघाले नाहीत. मी त्यांना सांगू इच्छितो मी मरणाला घाबरत नाही. २०१३ साली पाकिस्तानमध्ये गेलो होतो, तिथे जाऊन मी पाकिस्तानविरोधात बोललो, तुम्ही इथे माझ्या देशात मला रोखण्याची भाषा करताय. आत्ताही ऑपरेशन सिंदूरची यशोगाथा आणि भारतीय सैन्याचा पराक्रम सांगण्यासाठी सौदी अरेबियाला गेलो होतो. माझ्या तोंडातून कसे आणि काय शब्द निघाले हे भाजपच्या नेत्यांना विचारा. तुम्ही मला रोखण्याची भाषा करताय? अशा शब्दात एमआयएमचे प्रमुख असदुद्दीन ओवैसी यांनी हिंदुत्ववाद्यांवर हल्लाबोल केला.