चूक कुणाची? दुचाकीस्वार, रिक्षा की महामार्ग? कार डिव्हायडरला धडकली अन्..,बुलडाण्यातला VIDEO

बुलढाणा: महामार्गावर वाहन चालवत असताना शिस्त पाळण्याची गरज आहे, पण अनेक वेळा बेफामपणे वाहन चालवणारे महाभाग आपल्याला सर्रास पाहण्यास मिळतात. अशा वाहनचालकांमुळे नाहक इतर वाहनचालकांना त्रास सहन करावा लागतो. अशीच एक घटना बुलढाण्यामध्ये घडली आहे. एका रिक्षाला वाचवण्याच्या नादात भरधाव कार डिव्हायडरला धडकली आणि पलटी झाली. या अपघाताचा सीसीटीव्ही व्हिडीओ व्हायरल झाला आहे.

मिळालेल्या माहितीनुसार, बुलडाणा जिल्ह्यातील  मुंबई-नागपूर राष्ट्रीय महामार्ग क्रमांक 53 ला लागून असलेल्या सर्विस रोडवर खामगाव शहरात कारचा भीषण अपघात झाला आहे. दुचाकीस्वाराला ओव्हरटेक करणाऱ्या ऑटो रिक्षाला वाचवताना भरधाव चारचाकी डिव्हायडर ला जाऊन धडकली आहे.

या घटनेचा सीसीटीव्ही व्हिडीओ समोर आला आहे. व्हिडीओमध्ये स्पष्ट दिसतंय की, महामार्गावर एका रिक्षा चालला होता. त्याचवेळी महामार्गाच्या बाजूला असलेल्या एका हॉटेलसमोर एक दुचाकीस्वार निघाला होता. दुचाकीवर दोन जण स्वार होते. दुचाकी महामार्गावर थेट आली. त्यामुळे रिक्षाचालकाने रिक्षा बाजूला वळवला. त्याचवेळी पाठीमागून एक भरधाव कार आली. अचानक समोर रिक्षा वळल्यामुळे कार चालकाने धडक होऊ नये म्हणून कार थेट डिव्हायडरवर चढवली.

डिव्हायडरला कार धडकल्यानंतर समोरील चाक निखळलं आणि कार महामार्गावर उलटली. या विचित्र अपघातात कार पूर्णपणे उलटून कारचे प्रचंड नुकसान झालं आहे. सुदैवाने कारमध्ये असलेल्या दोघांचे प्राण थोडक्यात वाचले आहे. पण, कार उलटल्यानंतर स्थानिकांनी धाव घेऊन कारमध्ये अडकलेल्या लोकांना बाहेर काढलं. कारमधील प्रवाशांना किरकोळ दुखापत झाली होती. पण, अपघातास कारणीभूत असलेला दुचाकीस्वार घटनास्थळावरून पसार झालाा. ही संपूर्ण घटना सीसीटीव्ही कॅमेऱ्यामध्ये कैद झाली आहे.