आता आमची गरज राहिली नाही, मग जगायचं कसं? शेती अवजारे बनवणाऱ्यांवर का आली अशी वेळ?

छत्रपती संभाजीनगर : पावसाळ्याची चाहूल लागली आहे आणि खरीप हंगामाच्या तयारीला देखील वेग आला आहे. शेतशिवारात पेरणीपूर्व कामांची लगबग सुरू झाली आहे. मात्र, यंदाच्या हंगामात एक वेगळेच चित्र पाहायला मिळत आहे. एकेकाळी शेतीचा अविभाज्य भाग असलेली, लाकडी शेती अवजारे आता इतिहासजमा होण्याच्या मार्गावर आहेत. त्यांच्या जागी आधुनिक लोखंडी अवजारांनी आपले स्थान मजबूत केले आहे. हा बदल केवळ शेतीपुरता मर्यादित नसून, त्यावर अवलंबून असलेल्या एका मोठ्या पारंपरिक कारागीर समुदायाच्या उदरनिर्वाहावर गंभीर परिणाम करत असल्याचे लाकडी अवजारे निर्मितीकार अंबादास जाधव यांनी लोकल 18 सोबत बोलताना सांगितले.