Jalgaon news : ट्रॅक्टरचं सीट फाडलं म्हणून कुत्र्याला फासावर लटकवलं, फरफटत नेऊन नाल्यात फेकलं, जळगावचा VIDEO व्हायरल

जळगाव, 11 सप्टेंबर : जळगाव जिल्ह्यातील पारोळा तालुक्यातील बहादरपूर येथे विकृत असा प्रकार समोर आला आहे. एका हैवानाने कुत्र्याला बेदम मारहाण करत ट्रॅक्टरच्या ट्रालीला दोरीने बांधून फाशी देऊन मारल्याचा अत्यंत विकृत प्रकार घडला आहे. या घटनेचा व्हिडीओ आता व्हायरल झाला आहे. या प्रकरणी पारोळा पोलीस स्थानकात गुन्हा दाखल करण्यात आला आहेत.

जळगाव जिल्ह्यातील पारोळा तालुक्यातील बहादरपुर गावातलीही ऑगस्ट महिन्यातील ही घटना आहे. पण, या घटनेचा व्हिडीओ आता सोशल मीडियावर व्हायरल झाला आहे. संशयित आरोपी दिलीप भिमराव पारधी याने गावातील मोकाट फिरणारा काळ्या रंगाच्या कुत्र्यास बेदम मारहाण केली. नुसतं मारहाण करून तो थांबला नाही तर ट्रॅक्टरच्या ट्रॉलीवरील लोखंडी अँगलला दोरीच्या साहाय्याने लटकुन त्याला फाशी दिली. यानंतर कुत्र्याला ट्रॅक्टरला बांधून ओढत फरफटत नेत नाल्यात फेकून दिल्याचा भयानक प्रकार समोर आला.