Satara: दारूड्या रिक्षावाल्याने अनेकांना उडवलं, महिला पोलीस कर्मचाऱ्यालाही फरफटत नेलं, साताऱ्यातील घटनेचा VIDEO

मिळालेल्या माहितीनुसार,  साताऱ्यातील  मोळाचा ओढा परिसरात ही घटना घडली. साताऱ्यातील मध्यवर्ती ठिकाण म्हणजेच खंडोबाचा माळ येथून मनाली कॉर्नर परिसरात हा प्रकार घडला.  दारूच्या नशेत बेभान झालेल्या एका रिक्षाचालकाने अनेक वाहनांना धडक दिली. स्थानिकांनी या घटनेची माहिती पोलिसांना दिली.  घटनेची माहिती वाहतूक पोलिसांना मिळाल्यानंतर भाग्यश्री जाधव या महिला पोलीस कॉन्स्टेबल यांनी रिक्षाचा पाठलाग करत या रिक्षाचालकाला अडवण्याचा प्रयत्न केला.

मात्र रिक्षा चालकाने कॉलर पकडत हिसका देऊन त्यांना खाली पाडलं.  भाग्यश्री जाधव खाली पडल्या पण  त्यांचा रेनकोट रिक्षाचा मागील अँगलमध्ये अडकला होता. पण दारूच्या नशेत तर्राट झालेल्या रिक्षाचालकाने तशीच रिक्षा पळवली. रिक्षासोबत संबंधित महिला पोलीस कॉन्स्टेबल 200 मिटरहून अधिक फरफटत गेल्याची धक्कादायक घटना घडली आहे. ही संपूर्ण घटना खंडोबाचा माळ येथून मनाली कॉर्नरपर्यंत घडली. हा सगळा प्रकार  दुकानांमधील सीसीटीव्हीत कैद झाला आहे.

या घटनेत महिला पोलीस जाधव यांना हाताला आणि डोक्याला दुखापत झाली असून त्यांना खासगी रुग्णालयात उपचारासाठी दाखल करण्यात आलं आहे. या बेभान रिक्षा चालकाला संतप्त नागरिकांनी पकडून चोप दिला आहे. घटनेची माहिती मिळताच सातारा पोलीस तात्काळ घटनास्थळी दाखल झाले आणि आरोपी चालकाला ताब्यात घेतलं. सध्या आरोपीवर सातारा शहर पोलीस ठाण्यात गुन्हा दाखल करण्याची प्रक्रिया सुरू आहे.