Fraud with Farmers: शेतकऱ्यांनो, तुमचा माल विकताय, होईल असा स्कॅम....रहा सावध!

बुलढाण्याच्या  मलकापूर येथील प्रसिद्ध डॉक्टर प्रफुल पाटील यांनी शेकडो शेतकऱ्यांकडून विश्वासाच्या जोरावर  कापूस, मका, सोयाबीनची खरेदी केली. एका महिन्यात पैसे देतो अशा बोलीवर त्यांनी हा माल शेतकऱ्यांकडून खरेदी केला होता. डॉ प्रफुल्ल पाटील यांनी शेतकऱ्यांचा शेतमाल घेऊन त्याचा मोबदला म्हणून शेतकऱ्यांना चेक आणि नोटरी करून दिल्या आहेत. परंतू, त्यानंतर मात्र पाटील यांनी शेतकऱ्यांचे पैसे देण्यास टाळाटाळ सुरू केली.

नंतर संतप्त शेतकऱ्यांनी मलकापूर पोलिस स्टेशन गाठले. मलकापूर येथील ठाणेदार गणी यांनी जमावाला शांत केले. रीतसर तक्रार दाखल करावी त्या नंतर कारवाई करण्यात येईल असा सल्ला दिला. त्यानंतर आता शेतकऱ्यांनी यासंदर्भात रितसर तक्रार दाखल केली असून पोलीस आता या प्रकरणाचा अधिक तपास करणार आहेत.

शेतमालाच्या बाबतीत व्यापाऱ्यांकडून होणाऱ्या फसवणूकीच्या अशा घटना सातत्याने समोर येत असतात. त्यामुळे शेतकऱ्यांना माल विकताना शक्यतो बाजार समितीतील परवाना धारक अडते, दलाल यांच्या मार्फत विकावा. त्याचबरोबर व्यापाऱ्याकडे माल विकताना आधी त्याची पत तपासून नक्की बघावी, असे केल्यास तुमची फसवणूक टळेल, आणि कष्टाचे हक्काचे पैसे तुम्हाला मिळतील.