IAS Rajesh Aggarwal Transfer: दिग्गजांना बाजूला सारून IAS अधिकारी राजेश अग्रवाल राज्याचे मुख्य सचिव, सरकारचा मोठा निर्णय

निवृत्तीच्या उंबरठ्यावर असलेले मुख्य सचिव राजेश कुमार यांचे उत्तराधिकारी म्हणून राजेश अग्रवाल हे कार्यभार स्वीकारणार आहेत. राजेश अग्रवाल हे केंद्रात सामाजिक न्याय आणि अधिकारिता मंत्रालयातील अपंग व्यक्ती विभागाचे सचिव होते. अग्रवाल हे १९८९ बॅचचे आयएएस अधिकारी आहेत.

राजेश अग्रवाल हे १९८९ बॅचचे आयएएस अधिकारी असून, ते जवळपास एक दशकापासून केंद्र सरकारच्या विविध मंत्रालयांमध्ये कार्यरत आहेत. त्यांनी वित्तीय सेवा, आदिवासी व्यवहार, कौशल्य विकास, पेट्रोलियम आणि सामाजिक कल्याण या महत्त्वाच्या विभागांमध्ये जबाबदाऱ्या सांभाळल्या आहेत. महाराष्ट्रात त्यांनी अकोल्याचे जिल्हाधिकारी म्हणून काम केले असून, माहिती तंत्रज्ञान, लेखा आणि कोषागार विभागांमध्येही त्यांनी महत्त्वाची भूमिका बजावली आहे.

अग्रवाल पुढील आठवड्यात महाराष्ट्र शासनात रुजू होणार असून, त्यांचा निवृत्तीचा कालावधी नोव्हेंबर 2026 मध्ये आहे. ते मुख्य सचिव झाल्यानंतर 1989, 1990 आणि 1991 बॅचमधील काही वरिष्ठ आयएएस अधिकाऱ्यांना राज्य प्रशासनाचे सर्वोच्च पद मिळण्याची संधी गमवावी लागू शकते, असे सूत्रांचे म्हणणे आहे.

राजेश कुमार हे १९८८ बॅचचे आयएएस अधिकारी असून, त्यांना ३० ऑगस्टला निवृत्त व्हायचे होते. मात्र, त्यांचा कार्यकाळ तीन महिन्यांनी वाढवण्यात आला होता. तो नोव्हेंबरअखेर संपणार आहे. कुमार यांनी या वर्षी जून महिन्यात तत्कालीन मुख्य सचिव सुजाता सौनिक यांच्या निवृत्तीनंतर पदभार स्वीकारला होता.