निष्पाप लोकांचा बळी गेल्यानंर प्रशासनला आली जाग, नवले पूलाबद्दल वाहतूक विभागाचा महत्त्वाचा निर्णय

नवले पूलावर झालेल्या अपघातानंतर वाहतूक विभागाने वाहतूकीमध्ये पर्यायी मार्गाचा पर्याय उपलब्ध करून दिला आहे. नऱ्हे गावातल्या मानाजी नगरातील येणाऱ्या वाहनांना आता थेट मुंबई बंगळूरू महामार्गावर प्रवेश करता येणार नाही. या मार्गावरून सऱ्हास वाहनांची घुसखोरी होत असल्याने वारंवार अपघाताचा धोका निर्माण होत होता. या कारणामुळे हा प्रवेश मार्ग सिमेंट काँक्रीटच्या दुभाजकाच्या माध्यमातून कायमस्वरूपी बंद करण्यात येणार आहे. यासाठी पर्यायी मार्ग सर्व्हिस रोड आहे. वाहनांना प्रवेश करण्यासाठी आता केवळ सर्व्हिस रोडचा वापर करावा लागणार आहे. सोबतच, जांभूळवाडी परिसरात अपघाताचा धोका टाळण्यासाठी दोन रस्ते कायमस्वरूपी बंद करण्यात आले.

नवले पूलावरून साताऱ्याला जाताना, जांभूळवाडी तलावाजवळच्या लॉज आणि हॉटेल परिसरातील रस्त्यांवरून मोठ्या प्रमाणावर वाहने उलट दिशेने धाव घेत असल्याने अपघाताची शक्यता वाढली होती. यावर कठोर कारवाई करत वाहतूक विभागाने हे दोन्ही रस्ते लोखंडी दुभाजकाद्वारे कायमस्वरूपी बंद केले आहेत. रस्त्यावर मोठ्या प्रमाणावर वाहतूक कोंडी होत असल्यामुळे वाहतूक विभागाने हा मोठा निर्णय घेतला आहे. या निर्णयाला नागरिकांकडून कशा पद्धतीने प्रतिसाद मिळतोय, हे पाहणं महत्त्वाचं ठरणार आहे.