Railway News : रूळामध्ये बिघाड, आपात्कालीन परिस्थितीत आपोआप ब्रेक अन्... रेल्वे प्रवास आणखीन सुखकर होणार

सोलापूर जिल्ह्यातील धवळस ते भाळवणी या रेल्वे मार्गावर अधिकाऱ्यांनी नुकतीच स्वयंचलित प्रणालीची चाचणी घेतली. ही चाचणी यशस्वीपणे पार पडली असून रेल्वे बोर्डाने मंजूरी दिली आहे. ‘कवच’ स्वयंचलित सुरक्षा प्रणालीमध्ये अनेक गोष्टींची चाचणी घेण्यात आली. यामध्ये, थांब्यावर लोकल रेल्वे धोकादायकपणे सिग्नल ओलांडण्याबाबत (सिग्नल पास ॲट डेंजर), अचानक थांबा निर्माण करणे (ब्लॉक सेक्शन एसओएस), स्थानक प्रमुखाद्वारे थांबा निर्माण करणे (स्टेशन मास्टर एसओएस) आणि रुळ बदलताना रेल्वेची गती सुनिश्चित करणे (टर्नआउट्स ओव्हरस्पीड) या प्रकारच्या चाचण्या यशस्वीपणे पार पडल्या.

त्यामुळे भारतीय रेल्वेच्या प्रवाशांच्या सुरक्षिततेमध्ये आणखीनच वाढ होईल. इंजिन चालक अधिकच सुरक्षितपणे ट्रेन चालवू शकेल. सुरक्षिततेच्या दृष्टीने भारतीय रेल्वेचे हे महत्त्वपूर्ण पाऊल आहे. भविष्याच्या दृष्टीने तंत्रज्ञानातील बदल पाहता त्या पद्धतीनेच भारतीय रेल्वेने हे महत्त्वपूर्ण बदल केले आहेत. रेल्वेचे महाव्यवस्थापक धर्मवीर मीना यांनी रेल्वेच्या स्वयंचलित सुरक्षा प्रणालीविषयी सांगितले की, "भविष्यातील तंत्रज्ञानामधील बदल पाहता त्यासाठीची संपूर्ण परिसंस्था तयार करून प्रवाशांसाठीच्या सुरक्षा नियमांचे काटेकोर प्रशिक्षण आणि अंमलबजावणी करणे निश्चित केले आहेत. रेल्वेची कार्यक्षमता वाढवून प्रवाशांसाठीची सुरक्षा अधिकच सक्षम करायची आहे. शिवाय प्रवाशांना उत्तम सेवा देखील प्रदान केली जाणार आहे."