दोन दिवसांपासून बेपत्ता, मासेमारी करणाऱ्याला नदीत दिसला, जीभ छाटलेली, जळगावात युवकाचा घातपात?

जळगाव शहरातील तांबापुरा, बिलाल चौक परिसरातील शेख अबुजर शेख युनूस या २१ वर्षीय तरुणाचा मृतदेह तलावात आढळून आला. परंतु अबूजरच्या मृतदेहाची जीभ कापलेली असल्याचा संशय नातेवाईकांनी व्यक्त केल्यामुळे एकच खळबळ उडाली.

अबुजर दोन दिवसांपासून घरातून निघालेला होता. कुटुंबीयांनी त्याचा शोध घेतला, मात्र तो सापडला नाही. मेहरुन तलावात मासेमारी करत असताना एका व्यक्तीला तलावात मृतदेह तरंगताना आढळून आला. मृतदेह आढळून आल्याची माहिती मिळताच कुटुंबीय घटनास्थळी पोहोचत त्यांनी मृतदेहाची ओळख पटवली.

अबुजर याने अंगात घरातून बाहेर पडताना घातलेले कपडे होते आणि खिशात मोबाईल सापडला. मात्र जीभ कापलेली असल्याचा संशय व्यक्त करत हा घातपात असल्याचा आरोप नातेवाईकांकडून व्यक्त करण्यात आला असून, कुटुंबीयांनी सखोल तपासाची मागणी केली आहे. पोलिसांनी या प्रकरणाचा तपास सुरू केला आहे.