Eknath Khadse : सून रक्षा खडसेंना उमेदवारी मिळाल्याने माघार घेतली? नाथाभाऊ पहिल्यांदाच स्पष्ट बोलले

पवार गटाचे नेते एकनाथ खडसे म्हणाले, की नाथाभाऊने जे मिळवलं आहे ते कष्टाने, मेहनतीने आणि कार्यकर्त्यांच्या बळावर मिळवलं आहे. मी लाचार माणूस नाही, मी लढणारा माणूस आहे आणि लढत आलो आहे. सगळेच दगड का मारायला लागले, याचा अर्थ नाथाभाऊ मजबुत आहे. एक अकेला सबको भारी, तुम चिंता मत करो. मी काय करतो? माझा पक्ष मला सांगेल, हा कोण मला सांगणारा, गल्लीतील माणूस, असा पलटवार खडसे यांनी विरोधकांवर केला आहे. रोहिणी खडसे यांनी कधीही लोकसभा डोळ्यासमोर ठेवलेली नाही. त्या विधानसभा निवडणूक लढवणार आहेत. त्यामुळे रोहिणी ताईंचा विषय येत नाही. अजित पवार यांच्यासोबत सर्वजण गेले. मात्र, मी शरद पवार यांच्या सोबतच राहिलो, अशीगी आठवण खडसे यांनी करुन दिली.

सत्तेसाठी अजित पवार गटात जायला मला वाव होता. मात्र, मी पळून गेलो नाही. मी विधान परिषदेचा गटनेता राहिलेला आहे. संजय पवार हा खूप छोटा आणि किरकोळ माणूस आहे. संजय पवार हा आयुष्यात एकही निवडणूक हा लोकांमधून निवडून आलेला नाही. मागच्या दरवाजांनी यायचं. आता ते शरद पवार साहेबांच्या जीवावर निवडून आलेत. मी अजितदादा किंवा त्यांच्या मतावर निवडून आलेलो नाही. तर मी शरद पवार साहेबांच्या मतदानावर निवडून आलेलो आहे. यांनी उलट शरद पवार यांच्यासोबत गद्दारी केली आणि अजित पवार यांचा गट वेगळा केला. शरद पवार साहेबांसोबत विश्वासघात केला. मी महाराष्ट्रातला नेता आहे. राजकीय माणूस आहे. माझी उंची ही अजित पवार यांच्यावर टीका करणे एवढी आहे, असाही टोला खडसेंनी लगावला.

सतीश पाटील हे माझे मार्गदर्शक आहेत. त्यांनी जे वक्तव्य केले ते गैरसमजाच्या आधारावर केलं. त्यांनी मला विचारलं असतं तर मी त्यांना त्या संदर्भातली माहिती दिली असती. माझे दोन ब्लॉकेज शिल्लक आहे, त्याचे ऑपरेशन करायचे आहे. थेलियम टेस्ट केल्यानंतर डॉक्टरांनी सांगितले की ताण घेता येणार नाही, म्हणून मी निवडणुक लढवत नाही. माझ्या या परिस्थितीबाबत वेळोवेळी शरद पवार यांना कल्पना दिली होती. त्यावेळी रक्षा खडसे यांना उमेदवारी जाहीर झालेले नव्हती. समोर कोणीही असो मी निवडणुकींना घाबरणारा माणूस नाही. आजपर्यंत मी घाबरलेलो नाही, निवडून येत आलेलो आहे. मी कुणा कानाकोपऱ्यातून नाही तर सार्वजनिकपणे लोकांमधून निवडून आलेलो आहे. त्यामुळे माझे मंत्री सतीश पाटील यांनी उगाच चुकीचं वक्तव्य करून गैरसमज पसरू नये, असा सल्ला खडसे यांनी दिला.