Lok Sabha Election 2024 : खडसेंनी माघार घेताच रावेरमध्ये शरद पवारांचा नवा डाव; खास माणूस उतरवला लोकसभेच्या मैदानात

जळगाव, इम्तियाज अहमद, प्रतिनिधी : लोकसभा निवडणुकीचं बिगूल वाजलं आहे. सध्या राजकीय पक्षांकडून उमेदवारांची चाचपणी करण्यात येत आहे. अजूनही राज्यात महायुती आणि महाविकास आघाडीच्या जागा वाटपाचा तिढा सुटलेला नाही. मात्र काही ठिकाणी उमेदवारांची घोषणा करण्यात आली आहे. बारामती लोकसभा मतदारसंघाप्रमाणेच सर्व राज्याचं लक्ष लागलं होतं ते रावेर लोकसभा मतदारसंघाकडे. या मतदारसंघात भाजपानं रक्षा खडसे यांना उमेदवारी दिली आहे. तर दुसरीकडे याच मतदारसंघातून राष्ट्रवादी शरदचंद्र पवार गटाकडून माजी मंत्री एकनाथ खसडे किंवा त्यांची मुलगी रोहिनी खडसे यांना उमेदवारी देण्याच्या हालचाली सुरू झाल्या होत्या. त्यामुळे या मतदारसंघात सुनेविरोधात सासरा किंवा नणंद विरोधात भावजई अशी लढत पाहायला मिळण्याची शक्यता होती. मात्र या निवडणुकीतून एकनाथ खडसे यांनी आजारपणाचं कारण देत अचानक माघार घेतली.