Kaas Pathar : 'कास पठारा'वर आढळला जगातील सर्वात मोठा पतंग; काय आहे त्याचं खास वैशिष्ट्य?

'ॲटलास मॉथ'चे दर्शन दुर्मिळ मानले जाते. या पतंगाचा मुख्य अधिवास दक्षिणपूर्व आणि दक्षिण आशियामध्ये आहे. हा पतंग ज्या प्रदेशात आढळतो, तो प्रदेश जैवविविधतेने समृद्ध असल्याचे मानले जाते. या पतंगाच्या दर्शनामुळे कास पठार आणि सह्याद्रीच्या पश्चिम घाटालगतचा प्रदेश जैवविविधतेने संपन्न असल्याचे सिद्ध होते.

निसर्गप्रेमी आणि अभ्यासक रवी चिखले यांना हा पतंग कास पठारावर आढळून आला. हा निशाचर पतंग असून तो रात्रीच्या वेळी दिव्याच्या प्रकाशाकडे आकर्षित होतो. दालचिनी, पेरू आणि जांभूळ यांसारख्या झाडांवर तो आढळतो. यापूर्वी हा पतंग रायगड जिल्ह्यातील माणगाव आणि सांगली जिल्ह्यातील शिराळा येथेही आढळून आला आहे. नुकताच तो कोल्हापूर जिल्ह्यातील मुरगूड येथे एका हाॅटेलमध्येही आढळून आला आहे.