कसबा विधानसभा निवडणूक 2024 : प्रतिष्ठेच्या कसब्यात पुन्हा एकदा धंगेकर Vs रासने! वर्षभरात काय बदललं?

पुणे : पुण्यात असलेल्या 21 विधानसभा मतदारसंघांपैकी शहर हद्दीतील सगळ्यात प्रतिष्ठेची निवडणूक ठरणार आहे कसबा पेठ विधानसभा मतदारसंघातील. वर्षभरापूर्वी याच जागेवर पोटनिवडणूक झाली होती आणि धक्कादायक निकाल देत काँग्रेसचे रवींद्र धंगेकर भाजपच्या हेमंत रासने यांना पराभूत करून आमदार झाले होते. आता या मतदारसंघातून महाविकास आघाडीने विद्यमान आमदार धंगेकरांची उमेदवारी जाहीर केली होतीच. युतीनेही उशिरा का होईना इतर सर्व शंकांना पूर्णविराम देत पुन्हा एकदा पुणे महापालिकेच्या स्थायी समितीचे अध्यक्ष हेमंत रासने यांनाच उमेदवारी जाहीर केली आहे. धंगेकर विरुद्ध रासने हीच लढत पुन्हा एकदा होणार हे निश्चित झालं आहे. पण वर्षभरात पुलाखालून बरंच पाणी वाहून गेलं आहे. त्यामुळे प्रतिष्ठेच्या कसब्यात यंदा काय चित्र दिसणार हे पाहणं औत्सुक्याचं आहे.