कोल्हापूरचा विषयच वेगळा, रंकाळ्यावर कुत्री आणि प्रेमीयुगुलांना नवा नियम, अजिबात ही चूक करू नका!

कोल्हापूर : रंकाळा तलाव कोल्हापूरचे एक वैभव आहे. ऐतिहासिक, नैसर्गिक, अध्यात्मिक अशा अनेक बाबींमुळे रंकाळा तलावाला आणि आजूबाजूच्या परिसराला विशेष महत्त्व आहे. मात्र त्याच सोबत रंकाळा तलावातील पाणी प्रदूषण, सुविधांचा अभाव, वेळेवर न होणारी देखभाल दुरुस्ती अशा समस्या देखील वेळोवेळी समोर येत असतात. उद्यान आणि पदपथावर काही जणांचे गैरवर्तन आढळते. आता याच गैरवर्तनाच्या प्रकारांना रंकाळा संवर्धन व संरक्षण समितीच्यावतीने आळा घालण्यासाठी प्रयत्न केले जाणार आहेत.

रंकाळा संवर्धन आणि संरक्षण समिती ही रंकाळ्याच्या बाबतीत काळजी घेण्यासंदर्भात आणि जनजागृतीचे काम करते. त्यामुळे या समितीत असणारे रंकाळाप्रेमी आता रंकाळा उद्यान आणि पदपथावर नागरिकांनी अयोग्य वर्तन करु नये, यासाठी प्रयत्न करणार आहेत. रंकाळ्यावर बऱ्याचदा काही नागरिक आपले पाळीव कुत्रे फिरायला घेऊन येतात. त्याचबरोबर काहीजण रंकाळा उद्यान आणि पदपथावर सायकल घेऊन येत असतात. त्यात काहीजण तर मोटर सायकलवरून देखील जाताना रंकाळा उद्यान परिसरात यापूर्वी आढळले आहेत. त्यामुळे अशा प्रकारच्या गैरवर्तनांना आळा घालणे गरजेचे आहे, असे रंकाळा संवर्धन व संरक्षण समितीचे विकास जाधव यांनी सांगितले आहे.

दरम्यान, रंकाळा उद्यान, पदपथ या ठिकाणी गैरवर्तन करणाऱ्या लोकांना समजावून सांगतानाही काही वेळा वाद होतात. तर महापालिकेच्या उद्यानात वाहने किंवा पाळीव प्राणी घेऊन येण्यास बंदी असतानाही अशा प्रकारे नियम मोडले जात आहेत. त्यामुळे या बाबतीत महानगरपालिकेकडून देखील अशा नागिरकांवर दंडात्मक कारवाई व्हावी, अशी मागणीही या रंकाळा संवर्धन व संरक्षण समितीकडून करण्यात आली आहे.