थांब की भावा.., नवीन वर्षात कोल्हापूरच्या लेकी उतरल्या रस्त्यावर, Video

या मोहिमेसाठी कोल्हापूर शहरातील सीपीआर चौक या ठिकाणच्या सिग्नलवर या ड्रीम टीम फाउंडेशनच्या स्वयंसेवकांनी जनतेमध्ये वाहतूक नियमांसाठी प्रबोधन केले. ड्रीम टीमच्या 30 स्वयंसेवकांनी हातात अस्सल कोल्हापुरी रांगड्या भाषेतील वाहतूक नियमांबाबत सांगणारे फलक धरले होते. "थांब की भावा, पडू दे की सिग्नल हिरवा.. खाली बघा की राव इथं झेब्रा क्रॉसिंग हाय.. रुग्णवाहितीसाठी नेहमी डावी बाजू रिकामी ठेवा.. असे फलक वाहनधारकांचे लक्ष वेधून घेत होते. तसेच यावेळी हेल्मेट घातलेल्या दुचाकी वाहनधारकांचे गुलाबपुष्प देऊन स्वागतही करण्यात आले. तर यापुढे दर महिन्यातून एकदा तरी अशाच प्रकारे प्रबोधन करण्याचा संकल्प ड्रिम टीम या फाउंडेशनची सदस्य असलेल्या श्रुती चौगुले हिने सांगितले आहे.

खरंतर कोल्हापूर शहरातील खड्ड्यांमुळे कोल्हापूरची खड्डेपूर अशी ओळख बनत असताना कित्येक बेशिस्त वाहनधारकांमुळे वाहतुकीची समस्या वाढतच चालली आहे. कित्येकदा सिग्नलला झेब्रा क्रॉसिंगवर किंवा त्याहीपुढे वाहने उभी केली जातात. तर काहीजण तर डाव्या बाजूच्या लेनमध्ये वाहन उभे करतात. ज्यामुळे अँबुलन्ससारख्या वाहनांनाही अडथळे निर्माण होतात. तसेच सिग्नल हिरवा होण्याच्या 10 सेकंद आधीच पुढे पुढे जाणे, हे असले प्रकार तर कोल्हापुरात सर्रास होऊ लागले आहेत. अशामुळे अपघात होऊ शकतो, एखाद्याचा जीवही जावू शकतो. त्याचबरोबर सिग्नल असलेले चौकात विनाकारण हॉर्न वाजवल्याने ध्वनि प्रदूषणाचे प्रमाणही वाढत आहे. अशा वाहतूक नियमांबाबतीत सर्वच समस्यांवर उपाय म्हणून ड्रीम टीमने ही "मी जबाबदार कोल्हापूरकर" अशी मोहीम हाती घेतली आहे.

कोरोना काळात सुरू झालेली ड्रीम टीम फाउंडेशन ही त्यानंतरही समाजासाठी विविध उपक्रम राबवत आली आहे. यामध्ये सुरुवातीलाच कोरोना कालावधीत त्यांनी कोल्हापूरच्या सीपीआर रुग्णालय या ठिकाणी रुग्णांना आणि रुग्णांच्या नातेवाईकांना स्वतःच्या पैशातून 65 दिवस मोफत नाश्ता पुरवला होता. त्यानंतर थोडे पैसे साठवून त्यांनी याच रुग्णालयाच्या परिसरात सध्या फिल्टर पाण्याचे आणि गरम पाण्याचे वॉटर एटीएम सुरू केले होते.