कोल्हापूरच्या शेतकऱ्याचा नादच खुळा, एका गुंठ्यातून काढला 3 टन ऊस

उदय पाटील यांना मिळालेल्या उत्पन्नापैकी जवळपास 50 हजार रुपये खर्च वगळला तर 18 गुंठ्यात एकूण सुमारे अडीच लाख रुपये इतका निव्वळ नफा मिळाला आहे. याआधी त्यांनी भातपीक स्पर्धेमध्ये सहभाग नोंदवला होता. तर पॉलिहाऊस शेतीमध्ये जरबेरा फुलांची शेती देखील त्यांनी केली आहे. याचाच अनुभव घेत त्यांनी आपल्या 18 गुंठे शेतात उसाचे उत्तम पीक घेतले आहे.

उदय यांनी सुरवातीला आपल्या शेतात 10 ट्रॉली शेणखत घालून नांगरट करून उतारास चार फूटाची सरी काढली होती. यामध्येच भुईमूग आणि मिरची अशी आंतरपिके त्यांनी लावली होती. त्यानंतर 30 ऑगस्ट 2022 रोजी उदय यांनी उसाची एकडोळा पध्दतीने साधरण दीड फूटांवर लागवड केली होती. आपल्या शेतात त्यांनी ठिबक सिंचनद्वारे पाणीपुरवठा केला होता. तर असा नॅनोटेक, हायटेक, वीटाजाईम या आळवण्या त्यांनी दिल्या होत्या. तर बायोजाईम ग्रॅन्युअल्सही दिले होते. भुईमुगानंतर त्यांनी मेथीचे पीक घेतले होते.

शेती करताना त्यांनी एफको, महाधन, जयकिसान, युरीया अशा खतांचा आणि औषधांचा वापर केला. ऊस वाढीच्या कालावधीत त्यांनी शेतात तणनाशकाचा वापर केला नाही. त्या ऐवजी वारंवार शेतात त्यांनी पॉवर ट्रेलर ने नांगरट करून भांगलन केली होती. त्यामुळेच 18 गुंठ्यात तब्बल 30 फूट लांब अशा जवळपास 45 ते 50 पेर असणाऱ्या उसाचे उत्पादन त्यांनी घेतले आहे.