चांदीची प्रभावळ अन् सोन्याचे अलंकार, कसा आहे कोल्हापुरातील सुवर्ण गणपती!

सुवर्ण गणपती अशीच ओळख असलेल्या या गणेश मूर्तीवर पूर्णपणे सोन्याचे दागिने असून गणपतीच्या मागच्या बाजूला असलेली प्रभावळ ही चांदीची आहे. 70 ते 80 किलो चांदीची फक्त प्रभावळ असून त्यापेक्षा कित्येक पटीने जास्त किमतीचे सुवर्ण अलंकार गणेशमूर्तीवर आहेत. मात्र भाविकांनी ज्या श्रद्धेने हे अलंकार चढवण्यासाठी सहकार्य केले आहे त्या श्रद्धेचा मान ठेवून या अलंकारांचे मूल्यमापन करण्यात आलेले नाही, असे मंडळाचे कार्यकर्ते आदित्य सरनोबत यांनी सांगितले आहे.

गणेशमूर्तीच्या अंगावर असणारे सर्वच दागिने हे मुंबईच्या सराफाकडून बनवून घेण्यात आलेले आहेत. कोल्हापूर जिल्हा परिसरात पहील्यांदाच पूर्णपणे सोन्याच्या अलंकाराने मढवलेला सुवर्ण गणपती अशी या मंडळाची ख्याती होत आहे. या सुवर्ण अलंकारांमध्ये डोक्यापासून पायापर्यंत सर्व दागिन्यांचा समावेश आहे. डोक्याला किरीट, दोन्ही कान, सोंडेवरील झुल, दात, बाजूबंद, हातातील कंडे, दोन्ही हातातील शस्त्र, दाही बोटांतील अंगठ्या, गळ्यातील हार, दोन्ही हात, दोन्ही पाय, उंदिर असे हे सर्वकाही सोन्याचे बनवण्यात आल्याचे मंडळाचे कार्यकर्ते दुर्वांकुर खोत यांनी सांगितले आहे.

सर्वत्र सार्वजनिक गणेश मंडळांच्या मोठ्या गणेशमूर्तीसोबत छोटी गणेशमुर्ती पुजण्याची पद्धत आहे. दि गणेश फ्रेंड्स सर्कल या मंडळांने आपल्या गणपतीसोबत पुजली जाणारी छोटी गणेशमूर्ती देखील हुबेहूब मोठ्या मूर्तीप्रमाणेच केलेली आहे. ज्याप्रमाणे मोठ्या मूर्तीला दागिने आणि प्रभावळ आहे. अगदी तसेच दागिने आणि प्रभावळ छोट्या मूर्तीला देखील बनवण्यात आलेले आहेत.

या मंडळांनी गणेश मूर्ती वरील दागिन्यांकडे तर लक्ष दिलेच आहे मात्र मूळ गणपतीची मूर्ती देखील कशी सुंदर बनवता येईल याकडेही पाहिले आहे. मागच्या वर्षीपासून मंडळाच्या कार्यकर्त्यांनी कुंभाराला सांगून मूर्तीवर विशेष रंग चढवला होता. अतिशय सुंदर दिसणाऱ्या या रंगात मूर्ती रंगवून देण्याची मागणी त्या कुंभारकडे इतर काही मंडळांनी केली होती. मात्र तशा पद्धतीचा विशेष रंग त्या कुंभाराने इतर कोणत्याच मूर्तीला दिलेला नाही, असे मंडळाच्या कार्यकर्त्यांनी सांगितले आहे.

पूर्णपणे सोन्याच्या दागिन्यांनी वाढवण्यात आलेली गणेश मूर्ती पाहिली की त्या दागिन्याच्या सुरक्षेविषयी नक्कीच प्रश्न उपस्थित होतो. मात्र मंडळात असणाऱ्या गणेश मूर्तीवरील सर्व दागिन्यांची जबाबदारी ही त्या मंडळाच्या कार्यकर्त्यांवरच असते. रोज साधारण शंभर पेक्षा जास्त कार्यकर्ते रात्रीच्या वेळी देखील मंडळात उपस्थित असतात, असेही आदित्य सरनोबत यांनी सांगितले आहे.