हुपरी ते टेक्सास! गावच्या पोराचं मोठं काम; सुईशिवाय लसीकरण जगातील पहिलं संशोधन

जागतिक पातळीवर अशा प्रकारचे हे पहिलेच संशोधन आहे. हुपरीसारख्या गावातील या तरुणाने थेट अमेरिकेत आपले नाव कोरले आहे. सध्या अनेक लसी वेगवेगळ्या प्रकारच्या इंजेक्शन्सद्वारे दिल्या जातात. यामध्ये सुईची भीती, रुग्णांना होणारा त्रास आणि लसीकरणासाठी प्रशिक्षित कर्मचाऱ्यांची गरज यांसारख्या मर्यादा येतात. इंजेक्शनच्या भीतीमुळे अनेक रुग्ण लसीकरणापासून दूर राहण्याचा प्रयत्न करतात. मात्र, अमेरिकेतील टेक्सास युनिव्हर्सिटीत शिक्षण घेत असलेल्या डॉ. रोहन इंग्रोळे यांनी चक्क सुईमुक्त लसीकरण शक्य असल्याचे संशोधन करून जगाला अचंबित केले आहे!

डॉ. रोहन इंग्रोळे हे गेल्या 10 वर्षांपासून अमेरिकेतील टेक्सास युनिव्हर्सिटीमध्ये शिक्षण घेऊन संशोधन करत आहेत. त्यापूर्वी त्यांनी माध्यमिक शिक्षण रयत शिक्षण संस्थेत, तर पदवीपर्यंतचे शिक्षण कोल्हापुरातील केआयटी महाविद्यालयात पूर्ण केले. गेल्या 10 वर्षांपासून टेक्सास युनिव्हर्सिटीतील वेगवेगळ्या संशोधनात सहभागी असताना, डॉ. रोहन इंग्रोळे यांना लसीकरणासाठी सुईचा वापर न करता अनोख्या पद्धतीने लसीकरण करता येईल का, याबद्दल संशोधनास सुरुवात केली.