कोल्हापूरकर सतर्क राहा, राधानगरीचे 7 दरवाजे उघडले, त्यात 2 दिवस ऑरेंज अलर्ट!

कोल्हापूर : मागील काही दिवसांमध्ये पडलेल्या मुसळधार पावसामुळे अनेक भागांमध्ये पूरस्थिती निर्माण झाली होती. कोल्हापुरातील जनजीवन पुराचा फटका सोसल्यानंतर आता कुठं पूर्वपदावर यायला सुरूवात झाली, मात्र 31 जुलै रोजी सकाळीच राधानगरी धरणाचे सर्व 7 स्वयंचलित दरवाजे उघडले. यंदा पहिल्यांदाच हे दरवाजे उघडले असून त्यातून प्रचंड प्रमाणात भोगावती नदीपात्रात विसर्ग सुरू आहे. त्यामुळे पुन्हा एकदा कोल्हापुरात पूरस्थिती निर्माण होण्याची भीती व्यक्त केली जातेय.

कोल्हापुरात पंचगंगेसह सर्वच नद्या, नाले, ओढे दमदार पावसामुळे ओसंडून वाहत आहेत. पात्राबाहेर पडलेल्या नद्यांमुळे जनजीवन विस्कळीत झाल्याचं पाहायला मिळालं. जिल्ह्यात सर्वत्र पूरस्थिती निर्माण झाल्यानं हजारो नागरिकांना स्थलांतर करावं लागलं. पाऊस ओसरल्यानंतर पंचगंगा नदीच्या पाणीपातळीत संथगतीनं घट होत होती. शिवाय पाणी साचल्यानं बंद झालेले काही रस्तेसुद्धा वाहतुकीसाठी खुले करण्यात आले. मात्र आता राधानगरी धरणातून मोठ्या प्रमाणात विसर्ग सुरू झाल्यानं पूरस्थिती पुन्हा गंभीर होऊ शकते अशी भीती आहे.