विनेश फोगाट ऑलिम्पिकमध्ये अपात्र, कुस्तीपंढरी कोल्हापुरातील कुस्तीपटूंनी घातली ही भावनिक साद, VIDEO

कोल्हापूर : सध्या सुरू असलेल्या चुरशीच्या सामन्यांमुळे भारतासह जगभरातील क्रीडाप्रेमींचे लक्ष पॅरिस ऑलिम्पिकडे लागलेले आहे. गोल्डन गर्ल विनेश फोगाटने देखील अप्रतिम कामगिरी करत अंतिम सामन्यात आपली जागा निश्चित केली होती. तिने अंतिम सामन्यात सुवर्ण किंवा रौप्यपदक मिळवल्यानंतर जल्लोष करण्याची तयारी देखील सर्व देशभरातील क्रीडा प्रेमींनी केली होती. मात्र, ऑलिम्पिक पदकाची अपेक्षा असलेल्या देशभरातील क्रीडाप्रेमींसाठी अचानक एक दुःखद आणि धक्कादायक बातमी समोर आली. विनेश फोगाटचे वजन 50 किलोपेक्षा 100 ग्रॅम जास्त असून ती 50 किलो गटात बसत नाही. त्यामुळे अंतिम सामन्यातून तिला अपात्र घोषित करण्यात आले. त्यामुळे सध्या अवघ्या देशभरातील कुस्तीपटूंसह क्रीडाप्रेमी मध्ये दुःखाचे वातावरण पाहायला मिळत आहे.

पॅरिस ऑलिम्पिक 2024 मध्ये महिलांच्या 50 किलो फ्रीस्टाइल कुस्ती स्पर्धेत विनेश फोगाट अतुलनीय कामगिरी केली. 53 किलो वजनी गटात सुरुवातीला खेळणाऱ्या विनेशला 50 किलो गटामधून खेळावे लागले. तरीही आपले कमी केलेले वजन कायम राखत तिने 7 तासात 3 दिग्गज पैलवानांना पराजित केले होते. त्यामुळेच देशभरातील प्रत्येकाची तिच्याकडून सुवर्णपदकाची अपेक्षा होती. अंतिम सामन्यात गेल्यानंतर सर्वत्र तिच्यावर कौतुकाचा वर्षाव होऊ लागला होता. खरेतर सेमीफायनलनंतर वजन किंचीत वाढल्याचे कळताच विनेशने वजन कमी करण्यासाठी रात्रभर सायकलिंग, जॉगिंग करून मेहनत घेतली. मात्र, अंतिम सामन्यासाठी 50 किलोपेक्षा 100 ग्रॅम जास्त वजन भरल्यामुळे विनेश अपात्र ठरल्याची धक्कादायक बातमी समोर आली. या बातमीमुळे विनेशसह सर्वच भारतीय क्रीडा जगताचे ऑलिम्पिक सुवर्ण पदकाचे स्वप्न भंग झाले आहे.