रिलमध्ये शिव्या दिल्यामुळे काय काय सहन करावं लागलं? अखेर नारू, बालाजी आणि विशाल आले समोर!

इचलकरंजी मधील आक्षेपार्ह रिल केल्याप्रकरणी कोल्हापूरच्या स्थानिक गुन्हे शाखेच्या पथकाने विशाल बनगोडी, बालाजी डांगे आणि निवृत्ती परीट या तिघा तरुणांना कार्यालयात बोलवून समज देण्यात आली होती. या संदर्भात रिल स्टार विशाल बनगोडी याने पोलिसांनी आम्हाला कार्यालयात बोलवून घेतले होते. आम्ही बनवत असलेल्या रिलमुळे लहान मुलांवर त्याचे परिणाम होत आहेत असं समजावून सांगण्यात आलं. त्यानंतर माफी नाम्यासाठी व्हिडिओ रेकॉर्ड केला, असं विशालने सांगितलं.

विशाल बनगोडी, बालाजी डांगे आणि निवृत्ती परीट हे तिघे मूळचे इचलकरंजी मधील आहेत. सुरुवातीला यापैकी दोघांनी टिक टॉक या ॲप्लिकेशनचा आधार घेऊन व्हिडिओ करायला सुरु केले होते. टिक टॉक ॲप्लिकेशन बंद झाल्यानंतर त्यांनी इंस्टाग्रामकडे आपला मोर्चा वळवला. आणि हळूहळू हे तिघे त्यांच्या शैलीमुळे प्रसिद्ध होऊ लागले. सुरुवातीला त्यांनी विनोदात्मक शैलीतून वेगवेगळ्या पद्धतीने व्हिडिओ केले होते पण त्यांना तितका प्रतिसाद प्रेक्षकांकडून मिळत नव्हता. त्याकाळी काही व्हिडिओजमध्ये शिव्यांचा वापर होत होता. हे बघून या तिघांनीही अशा पद्धतीचे व्हिडिओ बनवण्याचं त्यांनी ठरवलं.

इचलकरंजी मधील मूळचे रहिवासी असणारे हे तिघेही तरुण शिवराळ भाषेत रिल करण्याअगोदर त्यांनी वेगवेगळ्या प्रकारचे सामाजिक संदेश असणारे किंवा विनोदक शैलीतील काही वेगवेगळे व्हिडिओ बनवले होते. मात्र प्रेक्षकांचा तितकाचा प्रतिसाद त्यांना मिळत नव्हता. त्यानंतर त्यांनी शिवराळ भाषेत रिल करण्याचं ठरवलं. याला प्रेक्षकांचा भरभरून प्रतिसाद त्यांना येताना पाहायला मिळाला. या संदर्भात बालाजी डांगे याने सांगताना आपण कोल्हापुरात राहत असल्याने शिव्यांचा तसा आपल्या भाषेमध्ये प्रभाव पाहायला मिळतो. एकंदरीतच लोकांनाच चांगलं बघायची आवड नाहीये. त्यांना अश्लील भाषा किंवा शिवराळ भाषा आपलीशी वाटते. लोकांना आपल्या बोलीभाषे बाबतीत प्रचंड आवड आहे आणि त्या पद्धतीनेच आम्ही असे व्हिडिओ बनवण्याचं सुरू केलं, असं सांगितलं.